തിരുവനന്തപുരം: എൻഡോസൾഫാൻ ദുരിതബാധിതർക്കായി നിരാഹാരം അനുഷ്‌ഠിക്കുന്ന ദയാഭായിയുടെ സമരത്തോട് ഭരണകൂടം പുലർത്തുന്ന അനങ്ങാപ്പാറ നയം തിരുത്തണമെന്ന് കെപിസിസി പ്രസിഡന്‍റ് കെ സുധാകരന്‍. നയം തിരുത്തിയില്ലെങ്കില്‍ കോണ്‍ഗ്രസ് പ്രവര്‍ത്തകര്‍ ശക്തമായ സമരവുമായി രംഗത്തിറങ്ങുമെന്നും അദ്ദേഹം വ്യക്തമാക്കി. ആയിരങ്ങളുടെ ദുരിതം നേരിൽ കണ്ടാണ് ദയാഭായി ഇത്തരമൊരു സമരത്തിനിറങ്ങിയത്.
എന്നാൽ ദയാഭായിയുടെ പ്രായം പരിഗണിച്ച് അനുകമ്പ കാണിക്കേണ്ട ഭരണകൂടം നിഷേധാത്മക നിലപാടാണ് സ്വീകരിക്കുന്നത്. ഒരു ഉദ്യോഗസ്ഥൻ പോലും സമര പന്തലിലേക്ക് തിരിഞ്ഞു നോക്കിയിട്ടില്ല. ഇത് പ്രതിഷേധാർഹമാണെന്നും സുധാകരൻ പറഞ്ഞു.
ദയാഭായിയെ സമരപന്തലിൽ സന്ദർശിച്ച ശേഷമാണ് സുധാകരൻ പിന്തുണയറിയിച്ചത്. 11 ദിവസമായി എൻഡോസൾഫാൻ ദുരിതബാധിതരുടെ ആവശ്യങ്ങൾ പരിഹരിക്കണം എന്നാവശ്യപ്പെട്ട് ദയാഭായി സെക്രട്ടേറിയറ്റിന് മുന്നിൽ നിരാഹാര സമരത്തിലാണ്.
