ദേവികുളം സബ് കലക്ടർ രേണു രാജിനെ അധിക്ഷേപിച്ച എസ്. രാജേന്ദ്രൻ എംഎൽഎയെ തള്ളി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. സിപിഎം ജില്ലാ നേതൃത്വം ശാസിച്ചതിനു തൊട്ടുപിന്നാലെയാണ് രാജേന്ദ്രന്‍റെ നടപടിയെ തള്ളി സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ തന്നെ രംഗത്തെത്തിയത്.
ഷുക്കൂർ വധക്കേസിൽ പ്രതിയായ ടി.വി രാജേഷ് എംഎൽഎ രാജിവെക്കണമെന്ന പ്രതിപക്ഷത്തിന്‍റെ ആവശ്യത്തിനെതിരേയും കോടിയേരി ബാലകൃഷ്ണൻ രംഗത്തെത്തി. കേസുകളിൽ പ്രതികളായ എംഎൽഎമാർ രാജിവക്കണമെന്നാണ് പ്രതിപക്ഷത്തിന്‍റെ ആവശ്യമെങ്കിൽ ആദ്യം ഉമ്മൻചാണ്ടി രാജിവച്ച് മാതൃകയാകട്ടെ എന്ന് കോടിയേരി ആവശ്യപ്പെട്ടു.
യുഡിഎഫിന് ജയം പ്രവചിച്ച് പുറത്തുവന്ന സർവ്വേ റിപ്പോർട്ടുകൾക്ക് യാഥാർത്ഥ്യവുമായി ബന്ധമില്ലെന്നും ഓരോ മണ്ഡലത്തിലെയും മുഴുവൻ വോട്ടർമാരെയും കണ്ട് എൽഡിഎഫ് സർവ്വേ നടത്തുമെന്നും കോടിയേരി വ്യക്തമാക്കി.
