തിരുവനന്തപുരം: കേരളത്തെ സമ്പൂര്‍ണ ഇ - ഗവേര്‍ണന്‍സ് സംസ്ഥാനമായി പ്രഖ്യാപിച്ച് മുഖ്യമന്ത്രി പിണറായി വിജയന്‍. സര്‍ക്കാര്‍ സേവനങ്ങള്‍ എളുപ്പത്തില്‍ ജനങ്ങള്‍ക്ക് ലഭ്യമാക്കുക എന്നാതാണ് സര്‍ക്കാര്‍ ലക്ഷ്യം. സര്‍ക്കാര്‍ സേവനങ്ങള്‍ ജനങ്ങള്‍ക്ക് ലഭ്യമാക്കുന്നതിനായി ഇ - സേവനം പോര്‍ട്ടല്‍ എന്ന ഏകജാലക സംവിധാനവും നിലവില്‍ വന്നിട്ടുണ്ട്.
ഇതിലൂടെ ഏകദേശം 900 സേവനങ്ങളാണ് പൊതുജനങ്ങള്‍ക്ക് ലഭിക്കുന്നത്. മറ്റൊരു പദ്ധതിയായ ഇ - ഡിസ്ട്രിക്‌ട് മുഖേന 7.5 കോടിയോളം സര്‍ട്ടിഫിക്കറ്റുകളും പൊതുജനങ്ങള്‍ക്ക് ലഭിക്കുന്നുണ്ട്. ഇ - ഗവേര്‍ണിങ് സംവിധാനങ്ങളെ ശക്തിപ്പെടുത്തുന്നതിന് സ്റ്റേറ്റ് ഡേറ്റാ സെന്‍റര്‍ സ്ഥാപിച്ചിട്ടുണ്ട്.
ഈ ഡേറ്റാ സെന്‍ററിനെ 14 ജില്ല ആസ്ഥാനങ്ങളുമായും 152 ബ്ലോക്ക് ആസ്ഥാനങ്ങളുമായും ബന്ധിപ്പിക്കുന്നതിന് കേരള സ്റ്റേറ്റ് വൈഡ് ഏരിയ നെറ്റ്‌വര്‍ക്ക് പദ്ധതി ആവിഷ്‌ക്കരിച്ചു. സര്‍ക്കാര്‍ ഓഫിസുകള്‍ക്കുള്ളിലെ ഫയല്‍ നീക്കം വേഗത്തിലാക്കുക എന്ന ലക്ഷ്യത്തോട ഇ - ഓഫിസ് സംവിധാനം ഏര്‍പ്പെടുത്തിയിട്ടുണ്ട്.
പദ്ധതിയുടെ ഭാഗമായി എല്ലാ വില്ലേജ് ഓഫിസുകളെയും സ്‌മാര്‍ട്ട് വില്ലേജ് ഓഫിസുകളാക്കി മാറ്റും. റീ - സര്‍വേ നടപടികളെ ശാസ്ത്രീയവും സുതാര്യവും വേഗതയുള്ളതും ആക്കുന്ന ഡിജിറ്റല്‍ റീ - സര്‍വേ പദ്ധതിക്ക് തുടക്കമായിട്ടുണ്ട്. കേരളത്തിലെ എല്ലാ പഞ്ചായത്തുകളിലും കഴിഞ്ഞ വര്‍ഷം സംയോജിത പ്രാദേശിക ഭരണ മാനേജ്‌മെന്‍റ് സമ്പ്രദായം നടപ്പാക്കുകയും അതുവഴി 250 സേവനങ്ങള്‍ ഓണ്‍ലൈനായി ലഭ്യമാക്കുകയും ചെയ്‌തു.
കേരള ജിയോ പോര്‍ട്ടല്‍ - 2: കേരള സ്‌പെഷ്യല്‍ ഡേറ്റാ ഇന്‍ഫ്രാസ്ട്രക്ച്ചര്‍ മുഖേന കേരള ജിയോ പോര്‍ട്ടല്‍ - 2 ആരംഭിച്ചു. ഇതുവഴി കേരളത്തിലെ 600 പഞ്ചായത്തുകളിലും 31 മുനിസിപ്പാലിറ്റികളിലും ദുരന്തനിവാരണ മാപ്പിങ് പൂര്‍ത്തിയാക്കി. സൈബര്‍ സാങ്കേതികതയുടെ ഈ കാലത്ത് അതിനനുസരിച്ചുള്ള നവീകരണം കേരള പൊലീസിലും നടപ്പിലാക്കിയിട്ടുണ്ട്.
സൈബര്‍ കുറ്റകൃത്യങ്ങള്‍ തടയുന്നതിലും ഓണ്‍ലൈന്‍ സേവനങ്ങള്‍ ലഭ്യമാക്കുന്ന കാര്യത്തിലുമെല്ലാം കേരള പൊലീസ് മികവ് പുലര്‍ത്തുന്നുണ്ട്. ആരോഗ്യ രംഗത്തും ഇ - ഗവേര്‍ണന്‍സിന്‍റെ ഭാഗമായിട്ടുള്ള നവീകരണം ആരംഭിച്ചിട്ടുണ്ട്. അതിന്‍റെ ഭാഗമായി ഇ - ഹെല്‍ത്ത് പദ്ധതി ആവിഷ്‌ക്കരിച്ചു. 509 ആശുപത്രികളിൽ ഇത് നിലവില്‍ വന്നുകഴിഞ്ഞു.
ഇത്തരത്തില്‍ അടിസ്ഥാന സൗകര്യ വികസനത്തിലും പ്രവര്‍ത്തനതലത്തിലും വിനിയോഗ തലത്തിലും കാര്യക്ഷമമായി ഇടപെട്ട് ഇ - ഗവേര്‍ണന്‍സ് സംവിധാനങ്ങളെ പൂര്‍ണതയിലേക്ക് എത്തിക്കുന്നതിനുള്ള നടപടികളാണ് സംസ്ഥാന സര്‍ക്കാര്‍ ആരംഭിച്ചിരിക്കുന്നത്. ഇവയെല്ലാം ചേര്‍ത്താണ് സംസ്ഥാനത്തെ സമ്പൂര്‍ണ ഇ - ഗവേര്‍ണന്‍സ് സംസ്ഥാനമായി മുഖ്യമന്ത്രി പ്രഖ്യാപിച്ചത്.
വാഗ്‌ദാനങ്ങള്‍ നിറവേറ്റുമെന്ന് മുഖ്യമന്ത്രി: കേരള ചരിത്രത്തിലെ ഒരു നാഴികക്കല്ലായിരിക്കും ഈ പദ്ധതിയെന്ന് മുഖ്യമന്ത്രി വ്യക്തമാക്കി. സര്‍ക്കാര്‍ സേവനങ്ങള്‍ ജനങ്ങളിലേക്ക് എന്ന എല്‍ഡിഎഫ് സര്‍ക്കാര്‍ നയം സാങ്കേതിക വിദ്യയെ പൊതുസേവന മേഖലയുമായി കൂട്ടിച്ചേര്‍ത്ത് നടപ്പാക്കുന്നതാണ് ഇതിലൂടെ യാഥാര്‍ഥ്യമാകുന്നത്.
ജനങ്ങള്‍ക്ക് നല്‍കിയ വാഗ്‌ദാനങ്ങള്‍ നിറവേറി സര്‍ക്കാര്‍ മുന്നോട്ട് പോകുമെന്നും മുഖ്യമന്ത്രി പറഞ്ഞു. സര്‍ക്കാറിന്‍റെ വാര്‍ഷിക ആഘോഷ പരിപാടി മാത്രമാക്കാതെ ജനോപകാരപരമായ പദ്ധതികളുമായി മുന്നോട്ട് പോവുകയാണ് സര്‍ക്കാര്‍ ലക്ഷ്യം. ജനങ്ങള്‍ക്ക് നേരിട്ട് ഉപയോഗപ്രദമായ പദ്ധതികളാണ് സര്‍ക്കാര്‍ ലക്ഷ്യമിടുന്നത്.
വാഗ്‌ദാനങ്ങള്‍ പ്രഖ്യാപനം മാത്രമായി കാണുകയല്ല സര്‍ക്കാറിന്‍റെ രീതി. പ്രകടന പത്രികയില്‍ പറഞ്ഞ കാര്യങ്ങളില്‍ എന്തൊക്കെ നടപ്പിലാക്കിയെന്ന് ജനങ്ങള്‍ക്ക് അറിയാനാണ് പ്രോഗ്രസ് റിപ്പോര്‍ട്ട് പുറത്തിറക്കുന്നത്. ഇത് ജനങ്ങള്‍ ആഗ്രഹിക്കുന്ന പുതിയ സംസ്‌കാരമാണെന്നും മുഖ്യമന്ത്രി വ്യക്തമാക്കി.
