തിരുവനന്തപുരം : എംടി വാസുദേവന്‍ നായരുടെ പ്രസംഗം മോദിക്കെതിരെയാണെന്നും അതിന് മുഖ്യമന്ത്രി പിണറായി വിജയനുമായി ബന്ധമില്ലെന്നുമുള്ള ഇടതുപക്ഷ കണ്‍വീനര്‍ ഇ പി ജയരാജന്‍റെ പ്രസ്‌താവന കൊട്ടാരം വിദൂഷകന്‍ എന്ന നിലയ്ക്കാണെന്ന് കെപിസിസി പ്രസിഡന്‍റ് കെ സുധാകരൻ. പിണറായി സ്‌തുതിപാഠകരുടെ സംഘനേതാവാണ് ജയരാജനെന്നും എല്ലാ ഏകാധിപതികള്‍ക്കെതിരെയും ഉയര്‍ന്ന മാനവരാശിയുടെ നിലവിളിയാണ് എംടിയുടെ വാക്കുകളിലൂടെ പുറത്തുവന്നതെന്നും അദ്ദേഹം വാർത്താക്കുറിപ്പിൽ പറഞ്ഞു (MT's Statement).
മോദിയും പിണറായിയും തമ്മില്‍ ഇതിൽ മത്സരം നടക്കുന്നത് ഒന്നും രണ്ടും സ്ഥാനങ്ങള്‍ക്കുവേണ്ടിയാണ്. എംടി താന്‍ മലയാളത്തിലാണ് സംസാരിച്ചതെന്നും മലയാളം അറിയാവുന്നവര്‍ക്കെല്ലാം താന്‍ പറഞ്ഞത് മനസിലാകുമെന്നും വ്യക്തമാക്കിയിട്ടുണ്ട്. അതിനു മുകളില്‍ കയറിയൊരു ഭാഷ്യം നല്‍കാന്‍ ശ്രമിക്കുന്നത് കൊട്ടാരം വിദൂഷകന്‍റെ ചുമതലയാണെന്നും സുധാകരന്‍ പറഞ്ഞു (K Sudhakaran on EP Jayarajan's statement).
എം ടിയുടേത് പൊതു പ്രസ്‌താവനയാണെന്നും ഇന്ത്യയുടെ പൊതു സന്ദർഭമായി വ്യാഖ്യാനിക്കാമെന്നും കവി സച്ചിദാനന്ദൻ പറഞ്ഞിരുന്നു. കോഴിക്കോട് നടക്കുന്ന ഏഴാമത് കേരള സാഹിത്യോത്സവത്തിന്‍റെ ഉദ്ഘാടന വേദിയിലായിരുന്നു എം ടി വാസുദേവന്‍ നായര്‍ മുഖ്യമന്ത്രി പിണറായി വിജയനെതിരെ രൂക്ഷമായി രാഷ്‌ട്രീയ വിമർശനം നടത്തിയത്. വേദിയിൽ മുഖ്യമന്ത്രി പിണറായി വിജയനും ഉണ്ടായിരുന്നു. എന്നാൽ പ്രസംഗം വിവാദമായതോടെ അത് സർക്കാറിനെയോ പിണറായിയേയോ ഉദ്ദേശിച്ചല്ലെന്നും മലയാളം അറിയാവുന്നവർക്ക് മനസിലാകുമെന്നും പറഞ്ഞ് എംടി വിശദീകരണം നല്‍കിയതായി സിപിഎം അനുകൂല മാധ്യമങ്ങള്‍ വാര്‍ത്ത നല്‍കിയിരുന്നു.
അതേസമയം അയോധ്യയില്‍ കോണ്‍ഗ്രസ് നിലപാട് മാറ്റിയത് ഇടതുപക്ഷ സ്വാധീനം മൂലമാണെന്ന് വിളിച്ചുപറയുന്ന സംസ്ഥാന സെക്രട്ടറി എം വി ഗോവിന്ദന്‍ വെറുമൊരു കാര്യസ്ഥന്‍ മാത്രമാണെന്നും സിപിഎം പൊളിറ്റ്ബ്യൂറോയും സംസ്ഥാന സമിതിയും സെക്രട്ടേറിയറ്റുമൊക്കെ ഇന്ന് വെറും രണ്ടുപേരിലേക്ക് ചുരുങ്ങിയിരിക്കുന്നുവെന്നും സുധാകരൻ കുറ്റപ്പെടുത്തി.
അമ്മായി അച്ഛനും മരുമകനും ചേര്‍ന്ന് സിപിഎമ്മിലെ കാര്യങ്ങള്‍ തീരുമാനിക്കുന്നതുപോലെയല്ല ലോകത്തിലെ തന്നെ ഏറ്റവും വലിയ ജനാധിപത്യ പാര്‍ട്ടിയായ കോണ്‍ഗ്രസില്‍ തീരുമാനങ്ങള്‍ ഉണ്ടാകുന്നത്. കോണ്‍ഗ്രസിന്‍റെ തീരുമാനം സുചിന്തിതവും സുവ്യക്തവുമാണ്. ഇത് കോണ്‍ഗ്രസിന്‍റെ പരമ്പരാഗതമായ മതനിരപേക്ഷമൂല്യങ്ങളെ വാനോളം ഉയര്‍ത്തിപ്പിടിച്ചു (Ayodhya and Congress).
ബാബ്‌റി മസ്‌ജിദ് പൊളിച്ചുമാറ്റി പ്രശ്‌നം പരിഹരിക്കണമെന്ന 1987ലെ ഇഎംഎസിന്‍റെ നിലപാടും 1989ല്‍ വിപി സിങ് സര്‍ക്കാരിന്‍റെ ഇടത്തും വലത്തുമായി സിപിഎമ്മും ബിജെപിയും ചേര്‍ന്നിരുന്നതുമൊക്കെയാണ് അയോധ്യാവിഷയം വഷളാക്കിയതെന്നും ഇന്ത്യ മുന്നണിയിലേക്ക് പ്രതിനിധിയെപ്പോലും അയക്കാന്‍ വിസമ്മതിക്കുന്ന സിപിഎം എക്കാലവും സംഘപരിവാര്‍ ശക്തികളുടെ കോടാലിക്കൈയായിരുന്നുവെന്നും സുധാകരൻ പറഞ്ഞു. അഞ്ച് കേന്ദ്ര അന്വേഷണ ഏജന്‍സികള്‍ മുഖ്യമന്ത്രിയുടെ ഓഫിസ് അരിച്ചുപെറുക്കിയിട്ടും പിണറായി വിജയനെതിരെ ഒരു എഫ്‌ഐആര്‍പോലും ഇടാത്തതും 37 തവണ ലാവ്‌ലിന്‍ കേസ് മാറ്റിവച്ചതുമൊക്കെ ഈ ബാന്ധവത്തിന്‍റെ ജീവിക്കുന്ന തെളിവുകളാണെന്നും കെ സുധാകരൻ കൂട്ടിച്ചേർത്തു.
Also Read: എംടി ആരെക്കുറിച്ചാണ് പറഞ്ഞതെന്ന് ജനങ്ങൾക്കറിയാം : വി മുരളീധരൻ
