തിരുവനന്തപുരം: സുഹൃത്തായ യുവതിയെ മർദിച്ചെന്ന കേസിൽ എൽദോസ് കുന്നപ്പിള്ളി എംഎൽഎയുടെ മുൻകൂർ ജാമ്യാപേക്ഷ ഇന്ന് കോടതി പരിഗണിക്കും. തിരുവനന്തപുരം സെഷൻസ് കോടതിയാണ് ഹർജി പരിഗണിക്കുന്നത്. കഴിഞ്ഞ മാസം പതിനാലിനാണ് കേസിനാസ്‌പദമായ സംഭവം.
അധ്യാപികയായ യുവതിയും എൽദോസ് കുന്നപ്പിള്ളിയും കോവളത്തെത്തുകയും തുടർന്ന് വാക്കുതർക്കമുണ്ടാകുകയും എൽദോസ് തന്നെ മർദിക്കുകയുമായിരുന്നുവെന്നാണ് യുവതി പരാതിയിൽ പറയുന്നത്. സിറ്റി പൊലീസ് കമ്മിഷണര്‍ക്ക് യുവതി നൽകിയ പരാതി കോവളം സ്‌റ്റേഷനിലേക്ക് കൈമാറിയെങ്കിലും കേസെടുത്തില്ല. സംഭവം വിവാദമായതോടെ ഇന്നലെ കോവളം പൊലീസ് കേസ് രജിസ്റ്റർ ചെയ്‌തു.
പിന്നാലെയാണ് എൽദോസ് കുന്നപ്പിള്ളി മുൻകൂർ ജാമ്യാപേക്ഷ സമർപ്പിച്ചത്. അതേസമയം സമൂഹ മാധ്യമം കൈകാര്യം ചെയ്യാമെന്ന് പറഞ്ഞ് തന്നെ സമീപിച്ച യുവതി മൊബൈൽ ഫോണടക്കം തട്ടിയെടുത്തെന്ന് എൽദോസ് ആരോപിക്കുന്നു. എംഎൽഎയ്‌ക്കെതിരെ ജാമ്യമില്ലാ വകുപ്പുകളാണ് ചുമത്തിയത്.
ഇന്നലെ പരാതിക്കാരിയുടെ മൊഴിയെടുക്കൽ പൂർത്തിയാക്കാൻ കഴിഞ്ഞിരുന്നില്ല. തുടരന്വേഷണം നടത്തുന്ന ജില്ലാ ക്രൈം ബ്രാഞ്ച് വീണ്ടും മൊഴിയെടുക്കും.
