തിരുവനന്തപുരം: തലസ്ഥാനത്ത് സൂപ്പർ ഹിറ്റായി സർവീസ് തുടരുന്ന സിറ്റി സർക്കുലർ ഇലക്ട്രിക് ബസുകൾ (City Circular Electric Bus Service) മറ്റ് നഗരങ്ങളിലേക്കും വ്യാപിപ്പിക്കാമെന്ന് ഗതാഗത വകുപ്പ്. പദ്ധതി മറ്റ് നഗരങ്ങളിലേക്കും വ്യാപിപ്പിച്ചാൽ പൊതു ഗതാഗത സംവിധാനം ശക്തിപ്പെടുമെന്നാണ് നിഗമനം. സിറ്റി സർക്കുലർ ഇലക്ട്രിക് ബസുകൾ മറ്റു നഗരങ്ങളിലേക്ക് വ്യാപിപ്പിക്കുമ്പോൾ കൊച്ചി, കോഴിക്കോട് നഗരങ്ങളാണ് പ്രഥമ പരിഗണനയിൽ ഉള്ളത്.
10 രൂപയാണ് സിറ്റി സർക്കുലർ സർവീസിലെ ടിക്കറ്റ് നിരക്ക് (City Circular KSRTC Bus Ticket Fare). 30 രൂപ ടിക്കറ്റിൽ ഒരു ദിവസം എത്ര വേണമെങ്കിലും യാത്ര ചെയ്യാം എന്നതാണ് മറ്റൊരു പ്രത്യേകത. സിറ്റി സർക്കുലറിൽ പ്രതിദിന യാത്രക്കാരുടെ എണ്ണം 70,000 കടന്നെന്നും കൂടുതൽ ബസുകൾ വരുന്ന മുറയ്ക്ക് കൂടുതൽ സ്ഥലങ്ങളിലേക്ക് സർക്കാർ വ്യാപിപ്പിക്കുമെന്നും കെഎസ്ആർടിസി ഇന്നലെ വാർത്താക്കുറിപ്പിൽ അറിയിച്ചിരുന്നു. നിലവിൽ 105 ബസുകളുമായാണ് സിറ്റി സർക്കുലർ സർവീസ് തലസ്ഥാനത്ത് സർവീസ് നടത്തുന്നത്.
'പി എം ഇ-ബസ് സേവ പദ്ധതി', ആദ്യ ടെന്‍ഡറില്‍ കേരളത്തിന് ബസുകള്‍ ഇല്ല: കേന്ദ്രസർക്കാരിന് മറുപടി നൽകാത്തതിനാൽ സംസ്ഥാനത്തെ പത്ത് നഗരങ്ങളിലേക്ക് 950 ബസുകൾ ലഭിക്കുമായിരുന്ന പി എം ഇ-ബസ് സേവ പദ്ധതിയിൽ (PM-eBus Sewa) ആദ്യത്തെ ടെൻഡറിൽ കേരളത്തിന് ബസുകൾ ലഭിക്കില്ല. 14-നാണ് 4000 ബസുകളുടെ ടെൻഡർ നടപടികള്‍ നടക്കുക. പദ്ധതി പ്രകാരം സംസ്ഥാനത്തിന് പണം മുടക്കില്ലാതെയാണ് ബസുകൾ കിട്ടുമായിരുന്നത്.
ഡ്രൈവർ ഉൾപ്പെടെയാണ് ബസ് ലഭിക്കുന്നത്. എന്നാൽ കണ്ടക്‌ടറെ കെഎസ്ആർടിസി നിയമിക്കണം. ഓരോ മൂന്നുമാസം കൂടുമ്പോഴും ലാഭത്തിൽ നിന്ന് കേന്ദ്രത്തിനുള്ള വിഹിതം അടയ്ക്കണം.
