ശബരിമല: നില്ക്കല്‍ ബേസ്‌ ക്യാമ്പിലെ പാര്‍ക്കിങ് ഏരിയയില്‍ ഗ്യാസ് ഉപയോഗിച്ച് പാചകം നടത്തുന്നതിന് നിയന്ത്രണം ഏര്‍പ്പെടുത്തി. ഇതര സംസ്ഥാനത്ത് നിന്നെത്തുന്ന അയ്യപ്പഭക്തര്‍ വാഹനങ്ങള്‍ പാര്‍ക്ക് ചെയ്‌തതിന് ശേഷമാണ് പാര്‍ക്കിങ് ഏരിയയില്‍ ആഹാരം പാകം ചെയ്തത്. ഇതുമൂലമുണ്ടാകാൻ സാധ്യതയുള്ള വന്‍ദുരന്തങ്ങള്‍ ഒഴിവാക്കാനാണ് നിരോധനം ഏർപ്പെടുത്തിയത്.
വാഹനത്തില്‍നിന്ന് നിശ്ചിത അകലം പാലിച്ചതിന് ശേഷമെ പാചകം നടത്താവൂവെന്നാണ് പുതിയ നിർദേശം. ഇത് സംബന്ധിച്ച ബോര്‍ഡുകള്‍ വിവിധഭാഷകളില്‍ സ്ഥാപിക്കാന്‍ നിലയ്ക്കല്‍ ദേവസ്വം അസിസ്റ്റൻ്റ് കമ്മിഷ്ണര്‍ക്ക് ഡ്യൂട്ടി മജിസ്‌ട്രേറ്റ് നിര്‍ദേശം നല്‍കി. വരുംദിവസങ്ങളില്‍ തിരക്ക് കൂടുന്ന സമയത്തിന് മുന്‍പായി പ്രസ്തുതബോര്‍ഡുകള്‍ സ്ഥാപിക്കേണ്ടതാണെന്നും കര്‍ശന നിര്‍ദേശം നല്‍കിയിട്ടുണ്ട്.
