മലപ്പുറം : നിരോധിത ഇസ്ലാമിക സംഘടനയായ പോപ്പുലർ ഫ്രണ്ട് ഓഫ് ഇന്ത്യയുടെ (പിഎഫ്ഐ) മുൻ പ്രവർത്തകരുടെ വീടുകളിൽ ദേശീയ അന്വേഷണ ഏജൻസി (എൻഐഎ) റെയ്ഡ് നടത്തി. ജില്ലയിലെ തിരൂർ, താനൂർ, മേഖലകളിലുള്ള മുൻ പ്രവർത്തകരുടെ വീടുകളിലാണ് റെയ്ഡ് നടന്നത്. ഇന്ന് പുലർച്ചെ ഒരേ സമയത്തായാണ് വീടുകളിൽ എൻഐഎ സംഘങ്ങള്‍ പരിശോധനയ്ക്ക് എത്തിയത്.
ഇതിന് മുൻപ് മഞ്ചേരിയിലെ പിഎഫ്ഐ ആസ്ഥാനമായ ഗ്രീൻ വാലിയിൽ ദേശീയ അന്വേഷണ ഏജൻസി പരിശോധന നടത്തി സീൽ ചെയ്‌തിരുന്നു. 2022 സെപ്‌റ്റംബറിലാണ് കേന്ദ്ര ആഭ്യന്തര മന്ത്രാലയം പോപ്പുലർ ഫ്രണ്ട് ഓഫ് ഇന്ത്യയെ നിരോധിക്കുകയും സംഘടനയുടെ പല മുൻനിര പ്രവർത്തകരെയും ജയിലലടയ്ക്കു‌കയും ചെയ്‌തത്. രാജ്യത്തെ ഇസ്ലാമിക രാഷ്‌ട്രമാക്കി മാറ്റുന്നതിനായി പ്രവർത്തിക്കുന്നതായാണ് സംഘടനയ്‌ക്കെതിരായ ആരോപണം.
കഴിഞ്ഞ ദിവസം നടന്ന റെയ്‌ഡുകളെ കുറിച്ചുള്ള കൂടുതൽ വിശദാംശങ്ങൾ പുറത്തുവന്നിട്ടില്ല. ഏപ്രിൽ 25 ന് രാജ്യത്തുടനീളം ഒന്നിലധികം പിഎഫ്ഐ കേഡറുകളുടെ വീടുകളില്‍ എൻഐഎ റെയ്ഡ് നടത്തിയിരുന്നു. അതേസമയം, ഉത്തർപ്രദേശ്, ബിഹാർ, പഞ്ചാബ്, ഗോവ, മധ്യപ്രദേശ് എന്നിവിടങ്ങളിലും റെയ്ഡ് ആരംഭിച്ചതായാണ് വിവരം. ബിഹാറിലെ 12 സ്ഥലങ്ങൾ, ഉത്തർ പ്രദേശിലെ രണ്ടിടങ്ങൾ, പഞ്ചാബിലെ ലുധിയാനയിലെയും ഗോവയിലെയും ഓരോ സ്ഥലങ്ങളിലും റെയ്‌ഡുകളുള്ളതായും റിപ്പോർട്ടുകളുണ്ട്.
ബിഹാറിൽ പിഎഫ്ഐ ബന്ധം ആരോപിച്ച് ഉറുദു ബസാർ സ്വദേശി ദന്തഡോക്‌ടർ സരിക് റാസയുടെയും ശങ്കർപൂർ നിവാസിയായ മെഹബൂബിന്‍റെയും വീടുകളിലാണ് റെയ്ഡ് നടന്നത്. പിഎഫ്ഐയുമായി ബന്ധപ്പെട്ട കേസിൽ സജ്ജാദ് അൻസാരിയുടെ വസതിയിലും റെയ്ഡ് നടത്തിയിരുന്നു. അൻസാരിയുടെ ആധാർ കാർഡും പാൻ കാർഡും ഉൾപ്പടെ പല രേഖകളും എൻഐഎ പിടിച്ചെടുത്തിട്ടുണ്ട്.
Also Read : ബിഹാറിൽ എൻഐഎ റെയ്ഡ്; 2 പിഎഫ്ഐ പ്രവർത്തകർ പിടിയിൽ, നാടൻ പിസ്റ്റളും കണ്ടെടുത്തു
പിഎഫ്‌ഐക്കെതിരായ കള്ളപ്പണം വെളുപ്പിക്കൽ കേസ് : ഇതിന് മുൻപ് ഓഗസ്‌റ്റ് അഞ്ചിന് പിഎഫ്‌ഐക്കെതിരായ കള്ളപ്പണം വെളുപ്പിക്കൽ കേസിൽ മൂന്നാറിൽ ഇഡി, വില്ലകളും സ്ഥലവും കണ്ടുകെട്ടിയിരുന്നു. പോപ്പുലർ ഫ്രണ്ട് സംസ്ഥാന വൈസ് പ്രസിഡന്‍റ് എൻ.കെ അഷ്റഫിന്‍റെ ഉടമസ്ഥതയിലുള്ള നാല് വില്ലകളും 6.75 ഏക്കര്‍ സ്ഥലവുമാണ് ഇഡി കണ്ടുകെട്ടിയത്. മൂന്നാര്‍ വില്ല വിസ്‌റ്റ പ്രൈവറ്റ് ലിമിറ്റഡിന് കീഴിലുള്ള 2.53 കോടി രൂപ വിലമതിക്കുന്ന സ്വത്തുവകകൾ കള്ളപ്പണം വെളുപ്പിക്കൽ നിരോധന നിയമത്തിന്‍റെ അടിസ്ഥാനത്തിൽ ആദ്യം താത്കാലികമായി അറ്റാച്ച് ചെയ്യുകയും പിന്നീട് കണ്ടുകെട്ടുകയുമായിരുന്നു.
പോപ്പുലർ ഫ്രണ്ടിന്‍റെ പ്രവർത്തനങ്ങൾക്കുള്ള ധനസമാഹരണാര്‍ഥം വിദേശ രാജ്യങ്ങളിൽ നിന്നും രാജ്യത്തിനകത്തുനിന്നും പിരിച്ചെടുത്ത പണം വെളുപ്പിക്കുന്നതിനാണ് മൂന്നാറിൽ വില്ല കമ്പനി വികസിപ്പിച്ചതെന്ന് ഇഡി വ്യക്തമാക്കിയിട്ടുണ്ട്.
