വഴിയാത്രയിലും നോമ്പ് തുറക്കാം ; വിഭവങ്ങൾ ഒരുക്കി ശിഹാബ് തങ്ങൾ റിലീഫ് സെൽ

പലവിധ സാഹചര്യങ്ങൾ കൊണ്ട് നോമ്പുതുറക്കാൻ വീട്ടിലെത്താത്ത യാത്രക്കാരെ ഉദ്ദേശിച്ചായിരുന്നു ഈ പദ്ധതിക്ക് തുടക്കമിട്ടത്.

മലപ്പുറം : വഴി യാത്രക്കാർക്കുള്ള നോമ്പുതുറ വിഭവങ്ങൾ ഒരുക്കി ശിഹാബ് തങ്ങൾ റിലീഫ് സെൽ. കാരക്കയും വെള്ളവും പഴങ്ങളും അടങ്ങിയ കിറ്റാണ് യാത്രക്കാർക്കായി ഇവർ ഒരുക്കിയിരിക്കുന്നത്.

കഴിഞ്ഞ വർഷം മുതലാണ് ശിഹാബ് തങ്ങൾ റിലീഫ് സെൽ നേതൃത്വത്തിൽ മലപ്പുറം കിഴക്കേത്തലയില്‍ യാത്രക്കാർക്ക് നോമ്പ് തുറക്കാനുള്ള സൗകര്യങ്ങളൊരുക്കി തുടങ്ങിയത്. പലവിധ സാഹചര്യങ്ങൾ കൊണ്ട് നോമ്പുതുറക്കാൻ വീട്ടിലെത്താത്ത യാത്രക്കാരെ ഉദ്ദേശിച്ചായിരുന്നു ഈ പദ്ധതിക്ക് തുടക്കമിട്ടത്. എല്ലാ ദിവസങ്ങളിലും വഴിയാത്രക്കാർക്ക് ഇവർ കിറ്റുകൾ വിതരണം ചെയ്യും. ദിവസവും 200 മുതൽ 250 ഓളം കിറ്റുകളാണ് ഇവർ വിതരണം നടത്തുന്നത്. ഈത്തപ്പഴം, വെള്ളം പഴങ്ങൾ തുടങ്ങിയ വിഭവങ്ങളാണ് കിറ്റിൽ ഉണ്ടാകുക. ദീർഘദൂര യാത്രക്കാർക്കും നോമ്പുതുറ സമയത്ത് വീട്ടിലെത്താൻ സാധിക്കാത്തവർക്കും വളരെയധികം സൗകര്യപ്രദമാണ് ഇവരുടെ സേവനങ്ങൾ.