കോഴിക്കോട്: ക്ലാസ് പരീക്ഷയിൽ കോപ്പിയടിച്ചെന്ന് ആരോപിച്ച് അധ്യാപകന്‍ വിദ്യാര്‍ഥിയെ മര്‍ദിച്ചെന്ന പരാതിയുമായി രക്ഷിതാക്കള്‍. താമരശേരി പൂനൂർ മർക്കസ് ഗാർഡൽ റെസിഡൻഷ്യൽ സ്കൂളിലെ എട്ടാം ക്ലാസ് വിദ്യാർഥി ജുമാന്‍ അബ്ദുലിനാണ് അധ്യാപകന്റെ മര്‍ദനമേറ്റത്.
ക്ലാസ് പരീക്ഷക്ക് കോപ്പിയടിച്ചെന്ന് ആരോപിച്ച് ഇന്നലെ ഉച്ചയോടെയാണ് അധ്യാപകനായ ഷാജിൽ കുട്ടിയെ മര്‍ദിച്ചതെന്ന് രക്ഷിതാക്കൾ പറഞ്ഞു. വടിക്കൊണ്ട് അടിച്ചതിനെ തുടർന്ന് കുട്ടിയുടെ മുതുകിനും കാലിനും പരിക്കേറ്റിട്ടുണ്ട്. വിവരം അറിഞ്ഞ് രക്ഷിതാക്കൾ എത്തി കുട്ടിയെ താമരശേരി താലൂക്ക് ആശുപത്രിയിൽ പ്രവേശിപ്പിക്കുകയായിരുന്നു. സംഭവത്തിൽ താമരശേരി പൊലീസിനും ചൈൽഡ് ലൈൻ അധികൃതർക്കും രക്ഷിതാക്കള്‍ പരാതി നല്‍കി.
