കോഴിക്കോട് : കേരളത്തിലെ മുഖ്യധാരാ രാഷ്ട്രീയ പാർട്ടികളെ മറയാക്കി നിരവധി പേർ കോഴിക്കോട്ട് മാവോയിസ്റ്റ് പ്രവർത്തനത്തിൽ സജീവമാണെന്ന് യുഎപിഎ കേസില്‍ അറസ്റ്റിലായ അലനും താഹയും മൊഴി നല്‍കിയതായി പൊലീസ്. 20 പേരാണ് പ്രമുഖ രാഷ്ട്രീയ പാർട്ടികളുടെ പ്രവർത്തകർ എന്ന നിലയില്‍ മാവോയിസ്റ്റ് മേഖലയില്‍ സജീവ ഇടപെടൽ നടത്തുന്നതെന്നും ഇവർ മൊഴി നൽകിയതായി പൊലീസ് പറയുന്നു. മനുഷ്യാവകാശ പ്രവർത്തനങ്ങളെക്കാൾ സുരക്ഷിതം വിവിധ രാഷ്ട്രീയ പാർട്ടികളുടെ അംഗങ്ങളായി പ്രവർത്തിക്കുക എന്നതാണ്. അതാണ് ഇത്തരം നീക്കത്തിന് പിന്നിലെന്നും പൊലീസ് വിശദീകരിക്കുന്നു.
മാവോയിസ്റ്റ് വിരുദ്ധ സർക്കാർ നടപടിയിൽ പ്രതിഷേധിച്ച് നഗരത്തിൽ നടത്താറുള്ള പ്രതിഷേധങ്ങൾക്ക് ഈ പ്രവർത്തകരാണ് നേതൃത്വം നല്‍കുന്നതെന്നും ഇവരുടെ മൊഴിയിലുണ്ട്. തീവ്ര നിലപാടുകൾ പ്രചരിപ്പിക്കുന്നതിന് സിപിഎം ആണ് കൂടുതൽ സുരക്ഷിതം എന്നതിനാലാണ് അലനും താഹയും സിപിഎമ്മിൽ തുടർന്നതെന്നും മൂന്ന് വർഷത്തോളമായി ഇരുവരും മാവോയിസ്റ്റ് പ്രവർത്തനങ്ങളിൽ സജീവമായിരുന്നുവെന്നും പൊലീസ് പറഞ്ഞു.
