കോഴിക്കോട് : പുരാവസ്‌തുക്കളുടെ വിൽപ്പനയുടെ മറവിൽ വൻ സാമ്പത്തിക തട്ടിപ്പ് നടത്തിയ മോൻസൺ മാവുങ്കലിനെതിരെ മുഖ്യമന്ത്രിക്ക് അതീവ രഹസ്യമായി നൽകിയ പരാതിയുടെ വിവരങ്ങളും ചോർന്നു. ആറ് പേർ ഒരുമിച്ച് ഒപ്പിട്ട പരാതിയുടെ വിവരങ്ങളാണ് ക്രൈംബ്രാഞ്ച് ഡിവൈ.എസ്.പി രാജ്മോഹൻ മോൻസണിന് ചോർത്തി നൽകിയത്.
സ്റ്റേറ്റ് സ്പെഷ്യൽ ബ്രാഞ്ച് (എസ്എസ്ബി) മോൻസണെതിരെ അന്വേഷണം നടത്താൻ സാധ്യതയുണ്ടെന്നും എന്നാൽ ഒരു തരത്തിലും പരിഭ്രമിക്കേണ്ട സാഹചര്യമില്ലെന്നുമായിരുന്നു രാജ്മോഹൻ മോൻസണെ അറിയിച്ചത്. രാജ്മോഹൻ്റെ അളിയനായ സി.ഐയായിരുന്നു അന്വേഷണ ഉദ്യോഗസ്ഥൻ. ഉദ്യോഗസ്ഥനെ ഡിവൈ.എസ്.പി കേസിൽ നിന്നും പിന്തിരിപ്പിക്കുകയായിരുന്നു.
Also Read: #ETV Bharat Exclusive: മോൻസണ്‍ തട്ടിപ്പ് തുടങ്ങിയത് ഇടുക്കിയില്‍ നിന്ന്
പരാതി കൊടുത്തതിന് ശേഷവും മോൻസണെ സമീപിച്ച് നീക്കങ്ങൾ മനസിലാക്കുന്നതിനിടെയാണ് പരാതിക്കാരിൽ ഒരാളും നിക്ഷേപകനുമായ എം.ടി ഷമീറിന്‍റെ മുന്നിൽവച്ച് മോൻസൺ ഡിവൈ.എസ്.പിയെ വിളിച്ചത്. പരാതിയിൽ പറഞ്ഞ വിവരങ്ങളൊക്കെ താൻ അറിഞ്ഞെന്നും അതൊന്നും നിലനിൽക്കില്ലെന്നുമായിരുന്നു മോൻസണിന്‍റെ മറുപടി യെന്ന് ഷമീർ പറയുന്നു.
എന്നാൽ പരാതിക്കാർ ശക്തമായ തെളിവുകൾ നൽകി നിരന്തരം പിൻതുടർന്നതോടെ മോൻസണിന്‍റെ കൈകളിൽ വിലങ്ങ് വീഴുകയായിരുന്നു.
