കോട്ടയം: പി.ജെ ജോസഫിനെ കടന്നാക്രമിച്ച് കേരളാ കോൺഗ്രസ് (എം) മുഖപത്രമായ പ്രതിച്ഛായ. 'പി.ജെ ജോസഫ് വഞ്ചനയുടെ ചരിത്രം ആവർത്തിക്കുന്നു' എന്ന തലക്കെട്ടിലെ ലേഖനത്തിലാണ് പി.ജെ ജോസഫിനെതിരായ വിമർശനങ്ങൾ ഉയര്‍ത്തിയിരിക്കുന്നത്.
ഉയിര് നൽകിയവർക്ക് ഉതകക്രിയ ചെയ്യുന്ന നിലപാടുകളാണ് പി.ജെ ജോസഫിന്‍റേതെന്നും ജോസ് കെ. മാണിയെ പിൻതാങ്ങേണ്ടതിന് പകരം അധികാരത്തിനായി ആരെയും ബലി കൊടുക്കുന്ന സമീപനമാണ് പി.ജെ ജോസഫ് സ്വീകരിക്കുന്നതെന്നും പ്രതിച്ഛായ പറഞ്ഞുവെക്കുന്നു. കെ.എം മാണിക്കൊപ്പം നിന്ന് അദ്ദേഹത്തിനെതിരായ യൂദാസുകൾക്ക് അവർ ആഗ്രഹിക്കുന്നതൊന്നും കിട്ടാൻ പോകുന്നില്ലെന്നും കിട്ടുന്ന അവസരത്തിൽ രാഷ്ട്രിയ വഞ്ചകനും അവസരവാദിയുമായ ഈ കേരളാ ഗാന്ധിയെ പുറത്താക്കുന്നതാവും അഭികാമ്യമെന്നും പ്രതിച്ഛായ ആഹ്വാനം ചെയ്യുന്നു. എന്നാൽ തനിക്കെതിരായ പ്രതിച്ഛായയിലെ ലേഖനങ്ങൾ മറുപടി അർഹിക്കുന്നതല്ലെന്നായിരുന്നു പി.ജെ. ജോസഫിന്റെ പ്രതികരണം.
