കൊല്ലം: കൊല്ലം ഹോക്കി സ്റ്റേഡിയത്തില്‍ നടക്കുന്ന സീനിയര്‍ വനിതാ ഹോക്കി ചാമ്പ്യന്‍ഷിപ്പില്‍ താരമായി യൂക്കോ ബാങ്ക് താരം നവനീത് കൗര്‍. ചാമ്പ്യന്‍ഷിപ്പില്‍ പങ്കെടുക്കുന്ന ഏറ്റവും പ്രായം കുറഞ്ഞ താരാണ് നവനീത്. ഹരിയാനയിലെ കുരുക്ഷേത്ര സ്വദേശിയായ നവനീതിന് 14 വയസ് മാത്രമാണുള്ളത്. നിരവധി സബ് ജൂനിയർ മത്സരങ്ങൾ കളിച്ചിട്ടുണ്ടെങ്കിലും ദേശീയ ടൂർണമെന്റ് കളിക്കുന്നത് ആദ്യമായാണെന്ന് നവനീത് കൗര്‍ ഇ.ടി.വി ഭാരതിനോട് പറഞ്ഞു. രണ്ട് മത്സരങ്ങളില്‍ നിന്നായി ഒരു ഗോളും താരം നേടിയിട്ടുണ്ട്.
സ്വദേശമായ കുരുക്ഷേത്രയിൽ ഹോക്കിക്ക് വലിയ പ്രചാരമുണ്ടെന്നും ഇത് ഏറെ പ്രചോദനം നല്‍കുന്നതായും നവനീത് പറഞ്ഞു. 2010 വനിതാ ഹോക്കി ലോകകപ്പ് ടീമിലെ ഏറ്റവും പ്രായം കുറഞ്ഞ താരമായ റാണി രാംപാലിനെയാണ് താന്‍ മാതൃകയാക്കുന്നത്. 10ാം തരത്തില്‍ പഠിക്കുന്ന നവനീത് ഹോക്കിക്ക് ഒപ്പം വിദ്യാഭാസവും കൊണ്ടുപോകുന്നുണ്ട്. കേരളത്തിന്‍റ പ്രകൃതിഭംഗി ഏറെ ഇഷ്ടമായെന്നും താരം കൂട്ടിച്ചേര്‍ത്തു.
അതിനിടെ, ചാമ്പ്യന്‍ഷിപ്പിലെ ബി ഡിവിഷനില്‍ ക്വാര്‍ട്ടര്‍ ഫൈനല്‍ ലൈനപ്പായി. സാഗി, എസ്എസ്ബി, ഗുജറാത്ത്, ബെംഗളുരു, മുംബൈ, ചണ്ഡീഗഡ് യൂക്കോ ബാങ്ക് ഹോക്കി അക്കാദമി, പട്യാല എന്നീ ടീമുകളാണ് ക്വാര്‍ട്ടറിലെത്തിയത്.
