കൊല്ലം: അഞ്ചലില്‍ സഹപ്രവര്‍ത്തകനും അടുത്ത ബന്ധുകൂടിയായ യുവാവിനെ വെട്ടികൊലപ്പെടുത്തിയ ശേഷം ക്രൂര വിനോദം നടത്തി പ്രതി അബ്ദുല് അലി. ആസാം സ്വദേശിയായ ജലാലുദീനെ വെട്ടികൊലപ്പെടുത്തിയ ശേഷം മൃതദേഹത്തിന്‍റെ ദൃശ്യങ്ങള്‍ പകര്‍ത്തിയ പ്രതി സോഷ്യല്‍ മീഡിയ ആപ്ലിക്കേഷനായ ലൈക്കിയില്‍ വീഡിയോ ഷെയര്‍ ചെയ്‌തു. കൊലയ്ക്ക് ശേഷം കഴുത്ത് അറുത്ത് ആത്മഹത്യക്ക് ശ്രമിച്ച പ്രതിയെ അടിയന്തര ശസ്ത്രക്രിയക്ക് ശേഷം തിരുവനന്തപുരം മെഡിക്കല്‍കോളജ് ആശുപത്രിയിലെ അത്യാഹിത വിഭാഗത്തില്‍ പ്രവേശിപ്പിച്ചിരിക്കുകയാണ്.
കഴിഞ്ഞ ദിവസം പുലര്‍ച്ചെയാണ് നാടിനെ നടുക്കിയ കൊലപാതകം നടന്നത്. കൊല്ലപ്പെട്ട ജലാലുദീന്‍റെ അലര്‍ച്ച കേട്ട് രണ്ടുപേര്‍ ഓടിയെത്തിയെങ്കിലും ഇവര്‍ക്ക് നേരെയും അബ്ദുല് അലി കത്തി വീശിയതോടെ ഇവര്‍ ഓടിരക്ഷപ്പെട്ടു. ഈ സമയം റൂമിലേക്ക് എത്താനുള്ള പ്രധാന വഴിയിലെ ഗ്രില്‍ പ്രതി അകത്ത് നിന്നും പൂട്ടുകയും മൊബൈല്‍ഫോണ്‍ ഉപയോഗിച്ച് മരിച്ചുകിടക്കുന്ന ജലാലുദീന്‍റെ ദൃശ്യങ്ങൾ പകര്‍ത്തുകയും ചെയ്‌തു. വിവരം അറിഞ്ഞ് നാട്ടുകാരും പൊലീസും എത്തിയതോടെ കഴുത്തറുത്ത് ഇയാള്‍ ആത്മഹത്യക്ക് ശ്രമിക്കുകയായിരുന്നു.
ആശുപത്രിയില്‍ കഴിയുന്ന പ്രതിയെ ചോദ്യം ചെയ്‌താല്‍ മാത്രമേ കൊലപാതകത്തിന് പിന്നിലെ കൃത്യമായ വിവരങ്ങള്‍ ലഭിക്കുവെന്ന് പൊലീസ് പറഞ്ഞു. റൂറല്‍ പൊലീസ് മേധാവി ഹരിശങ്കറിന്‍റെ മേല്‍നോട്ടത്തില്‍ പുനലൂര്‍ ഡിവൈഎസ്പി അനില്‍ ദാസ്, അഞ്ചല്‍ സര്‍ക്കിള്‍ ഇന്സ്പെക്ടര് സി.എല്‍ സുധീര്‍ എന്നിവരുടെ നേതൃത്വത്തിലാണ് കേസ് അന്വേഷിക്കുന്നത്.
