ആദിവാസി യുവാവിനെ തോട്ടിൽ വീണ് കാണാതായി: ഇരട്ടത്തോടിലും ബാവലിപ്പുഴയിലും പരിശോധന

തോട്ടിൽ വെള്ളം ഉയർന്നത് കാണാനായി എത്തിയ അജിത്തിനെ പെട്ടെന്ന് കാണാതാവുകയായിരുന്നു. കഴിഞ്ഞ ദിവസം മുഴുവൻ പരിശോധന നടത്തിയിട്ടും കണ്ടെത്താനായില്ല.

കണ്ണൂർ: കൊട്ടിയൂർ ഇരട്ടത്തോടിൽ ആദിവാസി യുവാവിനെ തോട്ടിൽ വീണ് കാണാതായി. ഇരട്ടത്തോട് കോളനിയിലെ അജിത്തിനെയാണ് കഴിഞ്ഞ ദിവസം (28-08-2022) വൈകിട്ട് അഞ്ചിന് കാണാതായത്. ഇരട്ടത്തോട് കോളനിക്ക് സമീപത്തെ കോളനി നിവാസികളോടൊപ്പം തോട്ടിൽ വെള്ളം ഉയർന്നത് കാണാനായി എത്തിയതായിരുന്നു അജിത്.

ഇതിനിടയിൽ അജിത്തിനെ കാണാതാവുകയായിരുന്നു. തുടർന്ന് കോളനിവാസികളും നാട്ടുകാരും ചേർന്ന് തോട്ടിൽ പരിശോധന നടത്തിയെങ്കിലും കണ്ടെത്താനായില്ല. ഇതേ തുടർന്ന് കേളകം പൊലീസ്, ഇരിട്ടി ഫയർഫോഴ്‌സ് എന്നിവർ സ്ഥലത്തെത്തി ഇരട്ടത്തോടിലും ബാവലിപ്പുഴയിലും വ്യാപക പരിശോധന നടത്തിയെങ്കിലും കണ്ടെത്തിയില്ല.

ഇന്ന് ബാവലിപ്പുഴയിലും തോട്ടിലും വീണ്ടും പരിശോധന നടത്തും. ചെങ്കൽ ലോറിയിൽ ജോലി ചെയ്‌ത് വരികയായിരുന്നു അജിത്ത്.