കണ്ണൂർ: മംഗലാപുരത്ത് നിന്നും കോഴിക്കോട് പോകുകയായിരുന്ന പാചകവാതക ടാങ്കര്‍ ലോറി മറിഞ്ഞ സംഭവത്തിൽ ഭീതിയൊഴിയുന്നു. മിനിലോക്ക്‌ഡൗൺ പ്രമാണിച്ച് വാഹനങ്ങൾ കുറവായതിനാൽ വൻ അപകടമാണ് ഇന്നലെ ഒഴിവായത്. ലോറിയില്‍ ഡ്രൈവര്‍ മാത്രമാണുണ്ടായിരുന്നത്. ഇയാളെ സാരമായ പരിക്കുകളോടെ ചാല മിംസ് ആശുപത്രിയില്‍ പ്രവേശിപ്പിച്ചിരുന്നു. ടാങ്കറിലുള്ള പാചകവാതകം സുരക്ഷിതമായി മാറ്റി.
ഇന്നലെ ഉച്ചയ്ക്ക് രണ്ട് മണിയോടെ ചാലയിലായിരുന്നു അപകടം. ടാങ്കര്‍ മറിഞ്ഞത് ശ്രദ്ധയില്‍പ്പെട്ട നാട്ടുകാര്‍ വേഗത്തില്‍ തന്നെ പൊലീസിനെയും ഫയര്‍ഫോഴ്‌സിനെയും വിവരമറിയിക്കുകയായിരുന്നു. തുടര്‍ന്ന് കണ്ണൂരില്‍ നിന്നുള്ള ഫയര്‍ഫോഴ്‌സ് സംഘവും പൊലീസും സ്ഥലത്തെത്തി രക്ഷാപ്രവര്‍ത്തനങ്ങള്‍ നടത്തി. ടാങ്കിന്‍റെ മൂന്ന് ഭാഗത്ത് വാതകചോര്‍ച്ചയുണ്ടായതായി കണ്ടെത്തി. ചോർച്ചയുള്ള അടി ഭാഗത്ത് മണ്ണിടുകയും ചെയ്തു. കൂടാതെ കണ്ണൂർ, മട്ടന്നൂര്‍, തലശേരി, കൂത്തുപറമ്പ്, തളിപ്പറമ്പ് എന്നിവിടങ്ങളില്‍ നിന്നും കൂടുതല്‍ ഫയര്‍ഫോഴ്‌സ് സംഘമെത്തി രക്ഷാപ്രവർത്തനം ത്വരിതപ്പെടുത്തി.
കണ്ണൂര്‍ സിറ്റി പൊലീസ് കമ്മീഷണര്‍ ആര്‍ ഇളങ്കോ, കണ്ണൂര്‍ കോര്‍പ്പറേഷന്‍ മേയര്‍ ടിഒ മോഹനൻ എന്നിവരുടെ നേതൃത്വത്തിലാണ് പ്രവർത്തനങ്ങൾ നടത്തിയത്. അപകടസാധ്യത കണക്കിലെടുത്ത് സംഭവസ്ഥലത്തിന്‍റെ നൂറ് മീറ്റര്‍ ചുറ്റളവില്‍ നിന്നും ആളുകളെ ഉടന്‍ മാറ്റുകയും പ്രദേശത്തെ വൈദ്യുതിബന്ധം വിഛേദിക്കുകയും ചെയ്തിരുന്നു. കൂടാതെ ഇതുവഴിയുള്ള ഗതാഗതവും നിരോധിച്ചു. ചേളാരിയില്‍ നിന്നുമെത്തിച്ച ഗ്യാസ് ടാങ്കറും വിവിധസ്ഥലങ്ങളില്‍ നിന്നെത്തിയ ആറ് ടാങ്കറിലുമായാണ് ഇന്ധനം മാറ്റിയത്. മംഗലാപുരത്ത് നിന്നും വിദഗ്‌ദ സംഘമെത്തിയാണ് ചോര്‍ച്ച നീക്കം ചെയ്‌തത്.
2012 ഓഗസ്‌റ്റ് 27ന് ചാലയിൽ പാചക വാതക ലോറി മറിഞ്ഞ് ഉണ്ടായ അപകടത്തിൽ സ്ത്രീകളും കുട്ടികളുമുള്‍പ്പെടെ 22 പേർ മരിച്ചിരുന്നു. മംഗലാപുരത്ത് നിന്നും കോഴിക്കോട് പാചക വാതകം കയറ്റി കൊണ്ടുപോകുന്ന ബുള്ളറ്റ് ടാങ്കര്‍ ലോറി ഡിവൈഡറില്‍ തട്ടി മറിയുകയും പിന്നീട് പൊട്ടിത്തെറിക്കുകയുമാണ് ചെയ്‌തത്. അതിന് സമാനസംഭവമാണ് ഇന്നലെ വീണ്ടുമുണ്ടായിരിക്കുന്നത്.
