തൊടുപുഴയിൽഏഴു വയസുകാരനെ അമ്മയുടെ സുഹൃത്ത് ക്രൂരമായി മർദ്ദിച്ച സംഭവത്തിൽ പ്രതിക്കെതിരെ പോക്സോ കേസ് ചുമത്തി.കുട്ടിയെ ക്രൂര മർദ്ദനത്തിന് പുറമെ ലൈംഗിക അതിക്രമത്തിന് ഇരയാക്കിയതിനാലാണ്പ്രതി അരുൺ ആനന്ദിനെതിരെ പോക്സോ കേസ് പൊലീസ് ചുമത്തിയത്. പോക്സോക്കൊപ്പം വധശ്രമം, കുട്ടികൾക്ക് എതിരായ അതിക്രമം തുടങ്ങിയ വകുപ്പുകളാണ് അരുണിനെതിരെ ചുമത്തിയിരിക്കുന്നത്. കൂടാതെ ഇളയകുട്ടിയെ മർദ്ദിച്ചതിനും പ്രത്യേക കേസെടുത്തിട്ടുണ്ട്.
മുഖ്യമന്ത്രി പിണറായി വിജയൻ ഇന്ന് കോലഞ്ചേരി ആശുപത്രിയിലെത്തി കുട്ടിയെ സന്ദർശിച്ചു. ചികിത്സ തുടരുമെന്ന് മുഖ്യമന്ത്രി പറഞ്ഞു. കുട്ടിയുടെ തലച്ചോറിലേക്കുള്ള രക്തയോട്ടം 90 ശതമാനവും നിലച്ച അവസ്ഥയിലാണ്. വെന്‍റിലേറ്റർ സഹായത്തോടെയാണ് കുട്ടിയുടെ ജീവൻ നിലനിർത്തുന്നത്. നിലവിലുള്ള ചികിത്സ തുടരാനാണ് മെഡിക്കൽ സംഘത്തിന്‍റെ നിർദ്ദേശം. എന്നാൽ കുട്ടിയുടെ ആരോഗ്യനില അതീവ ഗുരുതരമായി തുടരുന്നു. ദ്രവരുപത്തിലുള്ള ഭക്ഷണം ട്യൂബിലൂടെ നൽകിയെങ്കിലും തലച്ചോറിന്‍റെ പ്രവർത്തനം ഇപ്പോഴും മന്ദഗതിയിലാണെന്ന് ഡോക്ടമാർ പറയുന്നു.
