ഇടുക്കി: സേനാപതി കനകപ്പുഴയിൽ വീടിനുള്ളിലേക്ക് മൺതിട്ടയിടിഞ്ഞുവീണ് അപകടം. മണ്ണിനടിയിൽപ്പെട്ട ഗൃഹനാഥനെ സമീപവാസകൾ ചേർന്ന് രക്ഷപെടുത്തി. മാങ്ങാത്തൊട്ടി നടുമറ്റം റൂട്ടിൽ ശൗര്യംമാക്കൽ കുട്ടായി (മത്തായി)യെ ആണ് രക്ഷപെടുത്തിയത്. തിങ്കളാഴ്ച്ച രാത്രി പതിനൊന്നോടെയാണ് സംഭവം. കനത്ത മഴയെത്തുടർന്ന് വീടിന് പിൻഭാഗത്തെ വലിയ തിട്ട ഇടിഞ്ഞ് വീഴുകയായിരുന്നു.
പിന്നിലെ മുറിയിൽ കട്ടിലിൽ കിടന്നുറങ്ങുകായായിരുന്ന കുട്ടായിയുടെ അരയ്ക്ക് കീഴ്‌പോട്ടുള്ള ഭാഗം മണ്ണിൽ മൂടി. മാതാവും, ഭാര്യയും, മകളും മുന്നിലെ മുറിയിൽ ആയിരുന്നു. ശബ്ദം കേട്ട് ഓടിയെത്തിയ ഇവർ പരിസരവാസികളെ വിവരമറിയിച്ചു. തുടർന്ന് എല്ലാവരും ചേർന്ന് മണ്ണിൽ കുടുങ്ങിപ്പോയ കുട്ടായിയെ പുറത്തെടുക്കുകയായിരുന്നു. ഇദ്ദേഹത്തിന്‍റെ കാലിന് ചതവേറ്റിട്ടുണ്ട്. വീട്ടുപകരണങ്ങൾക്കും നാശം സംഭവിച്ചു. അപകടാവസ്ഥ നിലനിൽക്കുന്നതിനാൽ കുടുംബം രാത്രിയിൽത്തന്നെ ബന്ധുവീട്ടിലേക്ക് മാറി. സംഭവമറിഞ്ഞ് വില്ലേജ് അധികൃതർ സ്ഥലം സന്ദർശിച്ചു. പ്രദേശത്ത് കനത്ത മഴയും, കാറ്റും തുടരുകയാണ്.
