കാട്ടാന പലചരക്ക് കട തകര്‍ക്കുന്നതിന്‍റെ ദൃശ്യങ്ങള്‍
മൂന്നാര്‍: ഇടുക്കിയില്‍ കാട്ടാനകള്‍ വീണ്ടും പലചരക്ക് കട തകർത്തു. ചൊക്കനാട് എസ്റ്റേറ്റ് സൗത്ത് ഡിവിഷനിൽ പുണ്യവേലിന്‍റെ പലചരക്കുകടയാണ് കാട്ടാനക്കൂട്ടം തകർത്തത്. പതിനാറാമത്തെ തവണയാണ് ഈ കടയ്ക്കുനേരെ ആക്രമണം ഉണ്ടാകുന്നത്.
രാത്രി 12 മണിയോടെ സ്ഥലത്തെത്തിയ ആനക്കൂട്ടം കടയുടെ മുൻ വാതിൽ തകർത്ത് കടയിൽ ഉണ്ടായിരുന്ന അരി, ഗോതമ്പ്, പലചരക്ക് സാധനങ്ങൾ, പച്ചക്കറികൾ തുടങ്ങിവയെല്ലാം തിന്നുനശിപ്പിച്ചു. രണ്ട് കുട്ടികൾ ഉൾപ്പടെ അഞ്ച് ആനകളാണ് കട തകർത്തത്. ഇരുപതിനായിരം രൂപയുടെ നഷ്‌ടമാണ് സംഭവിച്ചത്.
ജനുവരി 19ാം തിയ്യതി ഇതേ കട കാട്ടാനകള്‍ തകർത്തിരുന്നു. പിന്നീട് നാട്ടുകാർ ആനക്കൂട്ടത്തെ കാട്ടിലേക്ക് വിരട്ടിയോടിക്കുകയായിരുന്നു.
