എറണാകുളം: മാരക മയക്കു മരുന്ന് എക്സ്റ്റസി പിൽസുമായി കൊച്ചി പാലാരിവട്ടത്ത് രണ്ടു യുവാക്കളെ പിടികൂടി. എറണാകുളം പുതുവൈപ്പ് പങ്കിയത്ത് വീട്ടിൽ സച്ചിൻ സേവ്യർ (23), ആലപ്പുഴ വണ്ടാനം മൂലശ്ശേരി വീട്ടിൽ ഫഹദ് റഹ്മാൻ(32) എന്നിവരാണ് പിടിയിലായത്. കൊച്ചി സിറ്റി ഡാൻസാഫ് സംഘവും പാലാരിവട്ടം പൊലീസും ചേർന്ന് നടത്തിയ പരിശോധനയിലാണ് ഇവരെ പിടികൂടിയത്.
ആലപ്പുഴ സ്വദേശിയായ ഫഹദ് രണ്ടുവർഷത്തോളമായി ഇടപ്പള്ളിയിൽ വാടകക്ക് താമസിക്കുകയാണ്. മാസങ്ങളായി ഡൻസാഫ് ടീമിൻ്റെ നിരീക്ഷണത്തിലായിരുന്നു ഇരുവരും. ബംഗളൂരു, തമിഴ്നാട് എന്നിവിടങ്ങളിൽ നിന്നും കുറഞ്ഞ വിലയ്ക്ക് ലഹരിവസ്തുക്കൾ വാങ്ങി എറണാകുളം നഗരത്തിൽ യുവാക്കൾക്കും വിദ്യാർഥികൾക്കും കൂടിയ വിലയിൽ വില്‍പ്പന നടത്തുകയായിരുന്നുവെന്നാണ് കണ്ടെത്തൽ.
പാലാരിവട്ടം പൊലിസ് സ്റ്റേഷനിൽ എഫ്‌ഐ‌ആർ രജിസ്റ്റർ ചെയ്ത് മയക്കുമരുന്ന് വസ്തുക്കളുടെ ഉറവിടം കണ്ടെത്താൻ അന്വേഷണം തുടരുകയാണെന്ന് കമ്മീഷണർ അറിയിച്ചു. ക്രിസ്‌മസ്, പുതുവത്സരാഘോഷം അനുബന്ധിച്ചുള്ള ഉത്സവ സീസണിൽ മയക്കുമരുന്ന് കടത്ത് നിയന്ത്രിക്കുന്നതിനായി 100 പൊലീസ് ഉദ്യോഗസ്ഥരെയും,15 ഡാൻസാഫ് അംഗങ്ങളെയുമാണ് കൊച്ചി കമ്മീഷണറേറ്റിൽ വിന്യസിച്ചിട്ടുള്ളത്.
