എറണാകുളം: മാത്യു കുഴൽനാടൻ എംഎൽഎക്കെതിരെ സർവേ റിപ്പോർട്ട് സമർപ്പിച്ച് റവന്യൂ വിഭാഗം (Survey Report Against Mathew Kuzhalnadan). കോതമംഗലത്തെ
കുടുംബ വീടിനോട് ചേർന്ന നെൽവയൽ മണ്ണിട്ടുനികത്തിയതിൽ ക്രമക്കേടുണ്ടെന്ന് സർവേ റിപ്പോർട്ടിൽ ഉള്ളതായാണ് സൂചന. പുതുതായി നിർമിച്ച കുളത്തിലേക്കുള്ള ചവിട്ടുപടികൾ ഉൾപ്പെടുന്ന ഭാഗം അനധികൃതമായി മണ്ണിട്ടുനികത്തിയെന്നാണ് പ്രധാനമായും ചൂണ്ടിക്കാണിക്കുന്നത്. കോതമംഗലം തഹസിൽദാർ എംകെ നാസറിനാണ് താലൂക്ക് സർവേയർ റിപ്പോർട്ട് കൈമാറിയത്.
ഓഗസ്റ്റ് പതിനെട്ടിനായിരുന്നു മാത്യു കുഴൽനാടൻ എംഎൽഎയുടെ (Mathew Kuzhalnadan MLA) കുടുംബ വീടിനോട് ചേർന്നുള്ള സ്ഥലത്ത്, താലൂക്ക് സർവേയർമാരായ എംവി സജീഷ്, രതീഷ് വി പ്രഭു എന്നിവരുടെ നേതൃത്വത്തിൽ അഞ്ച് റവന്യൂ വകുപ്പ് ഉദ്യോഗസ്ഥർ റീസർവേ നടത്തിയത്. നിലം നികത്താൻ അനുമതി ഉണ്ടായിരുന്നതിൽ കൂടുതൽ സ്ഥലത്ത് അനധികൃതമായി മണ്ണിട്ട് നികത്തി എന്നാണ് സർവേയില്‍ കണ്ടെത്തിയത്.
കഴിഞ്ഞ ദിവസം ലഭിച്ച റിപ്പോർട്ട് തുടർനടപടികൾക്കായി തഹസിൽദാർ കലക്ടർ എൻ എസ്‌ കെ ഉമേഷിന്‌ കൈമാറി. വിജിലൻസ് നിർദേശപ്രകാരമാണ് റവന്യൂ ഉദ്യോഗസ്ഥർ റീസർവേ നടത്തിയത്. ആധാരത്തിലുള്ള അളവ് പ്രകാരം അതിരുകൾ നിശ്ചയിച്ചാണ് അളവ് എടുത്തത്. എറണാകുളം, കടവൂർ വില്ലേജിലെ ആയങ്കരയിൽ 786/1, 812/2, 812/3 ബി, 812/1ബി, 812/22, 786/1 എന്നീ സർവേ നമ്പറുകളിലുള്ള 4.5 ഏക്കർ ഭൂമിയിലായിരുന്നു സർവേ. മൂന്നുമണിക്കൂറിലധികം സമയമെടുത്തായിരുന്നു സർവേ പൂർത്തിയാക്കിയത്.
കോതമംഗലത്തെ തറവാട് വീടിനോട് ചേർന്ന് അനധികൃതമായി കെട്ടിടങ്ങൾ നിർമിച്ചെന്ന് കാണിച്ച് നേരത്തെ പ്രാദേശിക ഡിവൈഎഫ്ഐ നേതാവ് വിജിലൻസിന് പരാതി നൽകിയിരുന്നു. രണ്ട് കെട്ടിടങ്ങൾ നിർമിച്ചതിന് അനുമതിയില്ലെന്ന് പഞ്ചായത്ത് ഓഫിസിൽ നിന്ന് വിവരാവകാശ നിയമപ്രകാരം ലഭിച്ച മറുപടി ഉൾപ്പെടുത്തിയായിരുന്നു പരാതി. ഇതേ തുടർന്നുള്ള അന്വേഷണത്തിന്‍റെ ഭാഗമായാണ് ഭൂമിയുടെ വിവരങ്ങൾ ശേഖരിച്ചത്.
ഭൂമി ഉൾപ്പടെ അളന്ന് വിവരങ്ങൾ ശേഖരിച്ച് നൽകണമെന്ന് റവന്യൂ വകുപ്പിനോട് വിജിലൻസ് ആവശ്യപ്പെട്ടിരുന്നു. ഇതേതുടർന്ന് താലൂക്ക് സർവേയർ ഭൂമി അളക്കാനുള്ള നോട്ടിസ് എംഎൽഎയ്ക്ക് നൽകിയിരുന്നു. താലൂക്ക് സർവേയറുടെ നേതൃത്വത്തിൽ അഞ്ച് റവന്യൂ ഉദ്യോഗസ്ഥരാണ് സർവേ നടത്തിയത്. മാത്യു കുഴൽനാടൻ തന്‍റെ വീടിനോട് ചേർന്ന് പുതുതായി രണ്ട് കെട്ടിടങ്ങൾ കൂടി അനുമതിയില്ലാതെ നിർമ്മിച്ചു. വീടിനോട് ചേർന്ന നിലം അനധികൃതമായി നികത്തി തുടങ്ങിയവയായിരുന്നു അദ്ദേഹത്തിനെതിരായ ആരോപണങ്ങൾ. മണ്ണിട്ടുനികത്തിയ സംഭവത്തിൽ വിജിലൻസ് അന്വേഷണവും പുരോഗമിക്കുകയാണ്.
അതേസമയം, മാസപ്പടി വിവാദത്തിൽ മുഖ്യമന്ത്രിക്കും മകൾക്കുമെതിരെ നിയമസഭയിൽ ഉൾപ്പടെ ചോദ്യങ്ങൾ ഉയർത്തി മാത്യു കുഴൽനാടൻ രംഗത്തെത്തിയിരുന്നു. ഇതിനുപിന്നാലെയാണ് സിപിഎം എറണാകുളം ജില്ല സെക്രട്ടറി സിഎൻ മോഹനനും, ഡിവൈഎഫ്ഐയും എംഎൽഎക്കെതിരെ രംഗത്തെത്തിയത്.
