എറണാകുളം: ആരോഗ്യരംഗത്ത് അടിസ്ഥാന മാറ്റം ലക്ഷ്യമാക്കിയുള്ള പദ്ധതികളാണ് സർക്കാർ നടപ്പാക്കുന്നതെന്ന് ആരോഗ്യവകുപ്പ് മന്ത്രി കെ കെ ശൈലജ. മൂവാറ്റുപുഴ ജനറൽ ആശുപത്രിയിലെ ഡയാലിസിസ് യൂണിറ്റിന്റെ ഉദ്ഘാടനം നിർവഹിക്കുകയായിരുന്നു മന്ത്രി. പ്രാഥമികാരോഗ്യ കേന്ദ്രങ്ങളും കുടുംബാരോഗ്യ കേന്ദ്രങ്ങളും താലൂക്ക് ആശുപത്രികളും അവയുടെ ഘടനയനുസരിച്ച് നവീകരിക്കുന്ന പദ്ധതികളാണ് സർക്കാർ ലക്ഷ്യമിടുന്നത്. ഇതിന്റെ ഭാഗമായി ആരോഗ്യമേഖലയിൽ മാത്രം പുതുതായി 5200 തസ്തികകളാണ് സർക്കാർ സൃഷ്ടിച്ചത്. കെട്ടിടങ്ങൾ വെറുതെ പണിയുന്നതിന് പകരം വ്യക്തമായ മാസ്റ്റർ പ്ലാനോട് കൂടിയ പദ്ധതികളാണ് ഓരോ ആശുപത്രികൾ കേന്ദ്രീകരിച്ചും സർക്കാർ നടപ്പാക്കുന്നതെന്നും എട്ട് ജില്ലാ ആശുപത്രികൾ കേന്ദ്രീകരിച്ച് കാത്ത് ലാബുകൾ ആരംഭിച്ചു കഴിഞ്ഞുവെന്നും മന്ത്രി വ്യക്തമാക്കി.
എല്ലാ ജില്ലാ ആശുപത്രികളിലും സ്ട്രോക്ക് യൂണിറ്റുകൾ ആരംഭിക്കും. പകർച്ച വ്യാധികളും ജീവിത ശൈലി രോഗങ്ങളുമാണ് കേരളത്തിലെ ആരോഗ്യ സുരക്ഷക്ക് ഭീഷണിയായിട്ടുള്ളത്. ഇതിനെ തടയിടുന്നതിനുള്ള കർമ്മ പദ്ധതികളാണ് നടപ്പാക്കുന്നതെന്നും മന്ത്രി കൂട്ടിച്ചേർത്തു. ചടങ്ങില്‍ എൽദോ എബ്രഹാം എംഎൽഎ അധ്യക്ഷത വഹിച്ചു.
