കൊച്ചി: പൊലീസ് ലാത്തിചാർജ് അന്വേഷണവുമായി ബന്ധപ്പെട്ട് റിപ്പോര്‍ട്ട് തയ്യാറാക്കുന്നതിന്‍റെ ഭാഗമായി എറണാകുളം ജില്ലാ കളക്ടർ എസ് സുഹാസിന്റെ നേതൃത്വത്തിൽ സിറ്റിംഗ് നടത്തി. എംഎല്‍എ എല്‍ദോ എബ്രഹാം, സിപിഐ ജില്ലാ സെക്രട്ടറി പി.രാജു ഉൾപ്പടെയുളളവർ പങ്കെടുത്തു. അതേസമയം അതിക്രമത്തിൽ പരിക്കേറ്റ സംസ്ഥാന സെക്രട്ടറിയേറ് അംഗമായ അഷലഫ് പാറക്കടവൻ അംബുലന്‍സിലാണ് സിറ്റിങ്ങിനെത്തിയത്.
കഴിഞ്ഞ ദിവസമാണ് സിപിഐയുട നേതൃത്വത്തില്‍ എറണാകുളത്ത് നടന്ന മാര്‍ച്ചിനെതിരെ പൊലീസ് അക്രമം ഉണ്ടായത്. സംഭവത്തില്‍ കലക്ടര്‍ റിപ്പോര്‍ട്ട് തേടണമെന്ന് മുഖ്യമന്ത്രി ആവശ്യപ്പെട്ടിരുന്നു. ഇതിന്‍റെ അടിസ്ഥാനത്തിലാണ് സിറ്റിംഗ് നടത്തിയത്. റിപ്പോർട്ട് തിങ്കളാഴ്ച മുഖ്യമന്ത്രിക്ക് സമർപ്പിക്കുമെന്ന് കലക്ടർ വ്യക്തമാക്കി.
കാര്യങ്ങളെല്ലാം സിപിഐ സംസ്ഥാന സെക്രട്ടറി കാനം രാജേന്ദ്രനെ ബോധ്യപ്പെടുത്തിയിട്ടുണ്ട്. സംസ്ഥാന നേതൃത്വം പൂർണ്ണമായ പിന്തുയുണ്ടെന്നും കലക്ടർ റിപ്പോർട്ട് സമർപ്പിച്ച ഉടൻ നടപടിയുണ്ടാകുമെന്ന് കാനം ഉറപ്പ് നല്‍കിയതായും ജില്ലാ സെക്രട്ടറി പി രാജു പറഞ്ഞു. എന്നാൽ എറണാകുളത്തെ സി.പി.ഐ പ്രവര്‍ത്തകര്‍ക്കെതിരായ പൊലീസ് ലാത്തി ചാർജിനെ ന്യായീകരിച്ചിട്ടില്ലെന്നും ലാത്തിച്ചാർജിനെ കുറിച്ച് താൻ നടത്തിയ പ്രതികരണത്തിൽ അതൃപ്തി ഉള്ളവർ പോസ്റ്റര്‍ ഒട്ടിച്ചല്ല ജനറല്‍ ബോഡിയിലാണ് അഭിപ്രായം പറയേണ്ടതെന്നും കാനം രാജേന്ദ്രൻ കൊച്ചിയില്‍ പറഞ്ഞു. പൊലീസ് ലാത്തിചാർജുമായി ബന്ധപ്പെട്ട കാര്യങ്ങൾ കളക്ടറുടെ തെളിവെടുപ്പിൽ പറഞ്ഞിട്ടുണ്ടെന്നും ഉചിതമായ നടപടികൾ ഉണ്ടാകുമെന്നു പ്രതീക്ഷിക്കുന്നതായും എൽദോ എബ്രഹാം പറഞ്ഞു.
