എറണാകുളം : പ്രോസിക്യൂഷൻ കോടതിയിൽ പറഞ്ഞത് മുഴുവൻ നുണയാണെന്ന് ദിലീപ്. അന്വേഷണവുമായി സഹകരിച്ചു. മൊബൈൽ ഫോണുകൾ കൈമാറി. ഫോൺ ലോക്ക് പാറ്റേണ്‍ വ്യക്തമാക്കാന്‍ അഭിഭാഷകൻ കൃത്യ സമയത്ത് കോടതിയിൽ എത്തിയെന്നും ദിലീപിന്‍റെ അഭിഭാഷകന്‍ വാദിച്ചു.
പ്രോസിക്യൂഷൻ ഇന്ന് സമർപ്പിച്ച സത്യവാങ്മൂലത്തിൽ തെറ്റായ ആരോപണങ്ങൾ ഉണ്ട്. അതിന് മറുപടി ഫയൽ ചെയ്യാനുണ്ട്. പ്രോസിക്യൂഷൻ പറഞ്ഞത് മുഴുവൻ നുണയാണെന്നും ഡിജിപി പൊലീസിൻ്റെ മൗത്ത് പീസായി മാറരുതെന്നും പ്രതിഭാഗം കോടതിയിൽ പറഞ്ഞു.
ഫോണുകൾ നൽകിയതല്ലെന്നും വാങ്ങിച്ചെടുത്തതാണെന്നും ഡിജിപി മറുപടി നൽകി. 'സാർ കുടുംബവുമായി സുഖമായി ജീവിക്കുകയല്ലേ'യെന്ന് കോടതിയിൽ വച്ച് ദിലീപ് അന്വേഷണ ഉദ്യോഗസ്ഥനായ ബൈജു പൗലോസിനോട് ചോദിച്ചിരുന്നുവെന്നും ഡിജിപി ചൂണ്ടിക്കാട്ടി.
എന്നാൽ ഇതിൽ എങ്ങനെ ഭീഷണിയുടെ സ്വരം വരുമെന്നും അങ്ങനെയെങ്കില്‍ എന്തുകൊണ്ട് അന്ന് പറഞ്ഞില്ലെന്നും ദിലീപിന്‍റെ അഭിഭാഷകൻ ചോദിച്ചു. മൂന്ന് ദിവസം ചോദ്യം ചെയ്‌തിട്ട് അവസാന ദിവസമാണ് ഫോണ്‍ ഹാജരാക്കാന്‍ നോട്ടീസ് നല്‍കുന്നത്. അപ്പോഴേക്കും അത് മുംബൈയ്ക്ക് അയച്ചിരുന്നു.
Also Read: 'ഗൂഢാലോചനയ്ക്ക് ശക്തമായ തെളിവുണ്ട്, ദിലീപ് ജാമ്യത്തിന് അര്‍ഹനല്ല' ; എതിർത്ത് പ്രോസിക്യൂഷൻ
അത് ഗൂഢാലോചനയായാണ് ചിത്രീകരിക്കുന്നത്‌. അന്വേഷണ ഉദ്യോഗസ്ഥരായ സുദർശനും സോജനും ശിക്ഷ നൽകുമെന്ന് പറഞ്ഞാൽ അത് ദൈവം കൊടുക്കുമെന്നാകാം. അല്ലാതെ ഗൂഢാലോചനയായി വ്യാഖ്യാനിക്കരുത്. ബാലചന്ദ്ര കുമാറിന്‍റെ മൊഴികളിലെ വൈരുധ്യം നിസാരവത്ക്കരിക്കരുതെന്നും പ്രതിഭാഗം പറഞ്ഞു.
അന്വേഷണ സംഘത്തിനെതിരെ ദിലീപ് കോടതിയിൽ മൊഴി നൽകിയിട്ടുണ്ട്. എഡിജിപിയും നാല് ഡിവൈ.എസ്.പിമാരും അടങ്ങുന്ന സംഘം കുറ്റസമ്മതം നടത്താൻ ആവശ്യപ്പെട്ടിരുന്നു. ഏഴ് ഫോണിലാണ് എല്ലാ തെളിവുമെന്നാണ് പറയുന്നത്. 14 ദിവസം അന്വേഷണ സംഘം എന്തെടുക്കുകയായിരുന്നു. 33 മണിക്കൂർ ചോദ്യം ചെയ്‌തിട്ടും തെളിവുകൾ ലഭിച്ചില്ലേയെന്നും ദിലീപ് ചോദിക്കുന്നു.
ദൃശ്യങ്ങൾ തന്‍റെ പക്കൽ നിന്നും കണ്ടെടുത്തെന്ന് വരുത്തി തീർക്കാൻ ശ്രമിക്കുകയാണ്. തന്നെ കസ്റ്റഡിയിൽ വിടരുതെന്നും മുൻകൂർ ജാമ്യം നൽകണമെന്നും ദിലീപ് കോടതിയിൽ ആവശ്യപ്പെട്ടു.
