എറണാകുളം : നടിയെ ആക്രമിച്ച കേസിൽ തുടരന്വേഷണം റദ്ദാക്കണമെന്ന് ആവശ്യപ്പെട്ട് നടൻ ദിലീപ് ഹൈക്കോടതിയിൽ സമർപ്പിച്ച ഹർജിയിൽ വാദം പൂർത്തിയായി. ഹർജി വിധി പറയാനായി മാറ്റി. നടിയെ ആക്രമിച്ച കേസിൽ വിശദമായ പരിശോധന ആവശ്യമാണെന്നും നിലവിൽ നടന്നുകൊണ്ടിരിക്കുന്ന തുടരന്വേഷണത്തിന് മൂന്ന് മാസം കൂടി സമയം അനുവദിക്കണമെന്നും പ്രോസിക്യൂഷൻ കോടതിയോട് ആവശ്യപ്പെട്ടു.
ഇതുവരെയുള്ള അന്വേഷണ വിവരങ്ങൾ പ്രോസിക്യൂഷൻ മുദ്രവച്ച കവറിൽ കോടതിക്ക് കൈമാറി. എന്നാൽ സമയപരിധി നീട്ടുകയല്ല മറിച്ച് അന്വേഷണം തടയുകയാണ് വേണ്ടതെന്ന് ദിലീപ് കോടതിയിൽ ആവശ്യപ്പെട്ടു. തുടരന്വേഷണത്തിന്‍റെ മറവിൽ തനിക്കെതിരെ വ്യാജ തെളിവുകൾ സൃഷ്‌ടിക്കുകയാണ്. നടിയെ ആക്രമിച്ച കേസ് അന്വേഷണത്തിലെ പാളിച്ചകൾ ഇല്ലാതാക്കാനാണ് തുടരന്വേഷണം നടത്തുന്നതെന്നും ദിലീപ് വാദിച്ചു.
Also Read: രണ്ടര വയസുകാരിക്ക് മർദനമേറ്റ സംഭവം: ആൻ്റണി ടിജിൻ പൊലീസ് കസ്റ്റഡിയിൽ
തുടരന്വേഷണം അനന്തമായി നീട്ടാനാകില്ലെന്നും ഒരാഴ്‌ചയ്ക്കുള്ളിൽ അന്വേഷണം പൂർത്തിയാക്കാൻ കഴിയില്ലേയെന്നും കോടതി ചോദിച്ചിരുന്നു. ഫോറൻസിക് പരിശോധനാഫലത്തിന്‍റെ അടിസ്ഥാനത്തിൽ ദിലീപടക്കമുള്ള പ്രതികളെ വീണ്ടും ചോദ്യം ചെയ്യണമെന്നും പ്രോസിക്യൂഷൻ അറിയിച്ചു. തുടരന്വേഷണം തടയരുതെന്ന് ഹർജിയിൽ കക്ഷി ചേർന്ന നടിയും കോടതിയിൽ ആവശ്യപ്പെട്ടിരുന്നു.
