ആലപ്പുഴ: കാർത്തികപ്പള്ളി വലിയകുളങ്ങരയിൽ ചതുപ്പിൽ നിന്ന് അജ്ഞാത യുവാവിന്‍റെ മൃതദേഹം കണ്ടെത്തി. കാർത്തികപ്പള്ളി പഞ്ചായത്ത് അഞ്ചാം വാർഡിലെ പൂട്ടിപ്പോയ കോർക്ക് കമ്പനിക്ക് സമീപം കാടുകയറി കിടക്കുന്ന ചതുപ്പിലാണ് മൃതദേഹം കണ്ടെത്തിയത്. സ്ഥലം ഉടമ മത്സ്യകൃഷി നടത്തുന്നതിനായി ജെസിബി ഉപയോഗിച്ച് ശുചിയാക്കുന്നതിനിടെയാണ് മൃതദേഹം കണ്ടെത്തിയത്.
മൃതദേഹം തിരിച്ചറിയാനാവാത്ത വിധം അഴുകിയ നിലയിലായിരുന്നു. തൃക്കുന്നപ്പുഴ പൊലീസ് സ്ഥലത്തെത്തി മേൽനടപടികൾ സ്വീകരിച്ചു. മൃതദേഹം ആലപ്പുഴ മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി.
ഒക്ടോബർ 14ന് തൃക്കുന്നപ്പുഴയിലെ ജോലി സ്ഥലത്ത് നിന്ന് കാണാതായ കന്യാകുമാരി സ്വദേശി സേവ്യറിന്‍റേതാണ് മൃതദേഹമെന്ന നിഗമനത്തിലാണ് പൊലീസ്. ഇയാളുടെ തിരോധാനത്തിൽ കുടുംബം നേരത്തെ തന്നെ ദുരൂഹത ആരോപിച്ചിരുന്നു.
വലിയകുളങ്ങര ക്ഷേത്രത്തിന് സമീപം വീട് നിർമാണത്തിനായി എത്തിയതായിരുന്നു സേവ്യർ. മറ്റ് ജോലിക്കാർക്കൊപ്പമാണ് ഇയാൾ താമസിച്ചിരുന്നത്. എന്നാൽ ഒക്ടോബർ 14 മുതൽ കാണാതാകുകയായിരുന്നു.
കണ്ടെത്തിയ മൃതദേഹം സേവ്യറിന്‍റേത് തന്നെയാണോ എന്നുറപ്പാക്കാൻ ഡിഎൻഎ പരിശോധന വേണ്ടിവരുമെന്നും അതിനുള്ള നടപടികൾ ആരംഭിച്ചിട്ടുണ്ടെന്നും പൊലീസ് അറിയിച്ചു.
Also Read: ഓൺലൈനിൽ വ്യാജ പരസ്യം നൽകി തട്ടിപ്പ്; പ്രതി അറസ്റ്റിൽ
