മാഡ്രിഡ്: ഇന്ത്യൻ ചെസ് ലോകത്ത് ചരിത്ര നേട്ടവുമായി വൈശാലി രമേഷ്ബാബു (Vaishali Rameshbabu). ഇന്ത്യയുടെ മൂന്നാമത്തെ വനിത ഗ്രാൻഡ്‌മാസ്റ്ററെന്ന നേട്ടമാണ് ചെസ് സെന്‍സേഷന്‍ ആർ പ്രജ്ഞാനന്ദയുടെ(R Praggnanandhaa) സഹോദരിയായ വൈശാലി സ്വന്തമാക്കിയത്. എല്ലോബ്രെഗട്ട് 2023 ഓപ്പണിനിടെയാണ് ഗ്രാൻഡ്‌മാസ്റ്റര്‍ യോഗ്യതയ്‌ക്കായുള്ള അന്താരാഷ്‌ട്ര ചെസ് ഫെഡറേഷന്‍റെ (International Chess Federation) 2500 റേറ്റിങ്‌ പോയിന്‍റ് 20-കാരി മറികടന്നത്.
സ്‌പെയ്‌നിലാണ് ടൂര്‍ണമെന്‍റ് നടന്നത്. കൊനേരു ഹംപി (Koneru Humpy), ഹരിക ദ്രോണവല്ലി (Harika Dronavalli) എന്നിവരാണ് വൈശാലി രമേഷ്ബാബുവിന് മുന്നെ ഗ്രാൻഡ്‌മാസ്റ്റര്‍ പട്ടം ചൂടിയ ഇന്ത്യയുടെ മറ്റ് വനിത താരങ്ങള്‍ (Vaishali Rameshbabu becomes India's third female chess grandmaster). പുതിയ നേട്ടത്തോടെ ഇളയ സഹോദരനൊപ്പം ഒരു അപൂര്‍വ റെക്കോഡ് സ്വന്തമാക്കാനും വൈശാലി രമേഷ്ബാബുവിന് കഴിഞ്ഞു.
ഗ്രാൻഡ്‌മാസ്റ്റര്‍മാരായി മാറുന്ന ചരിത്രത്തിലെ ആദ്യ സഹോദരങ്ങളാണ് വൈശാലിയും പ്രജ്ഞാനന്ദയും (Vaishali Rameshbabu R Praggnanandhaa First Grandmaster sibling Duo). വൈശാലി രമേഷ്ബാബുവിന്‍റെ വ്യക്തിഗത നേട്ടത്തേയും പ്രജ്ഞാനന്ദയ്‌ക്കൊപ്പമുള്ള റെക്കോഡിനേയും അഭിനന്ദിച്ച് തമിഴ്‌നാട് മുഖ്യമന്ത്രി എംകെ സ്റ്റാലിന്‍ ഉള്‍പ്പെടെ നിരവധി പേര്‍ സോഷ്യല്‍ മീഡിയ പ്ലാറ്റ്‌ഫോമായ എക്‌സില്‍ പോസ്റ്റിട്ടിട്ടുണ്ട്.
ചെന്നൈ സ്വദേശികളായ രമേഷ്ബാബു- നാഗലക്ഷ്മി ദമ്പതികളുടെ മക്കളാണ് വൈശാലിയും പ്രജ്ഞാനന്ദയും. വൈശാലി കാര്‍ട്ടൂണിന് അടിമപ്പെടുന്നത് ഒഴിവാക്കാനായി ആണ് പിതാവ് രമേഷ്ബാബു ഇരുവര്‍ക്കും ചെസ് പരിചയപ്പെടുത്തുന്നത്. നേരത്തെ പല ശ്രമങ്ങളും നടത്തി പരാജയപ്പെട്ടതിന് ശേഷമായിരുന്നു രമേഷ്ബാബു തന്‍റെ മക്കള്‍ക്ക് മുന്നില്‍ ചെസിന്‍റെ വാതില്‍ തുറന്നിടുന്നത്.
ചെസിനോട് താല്‍പര്യം കാണിച്ച വൈശാലി അനിയനേയും ഒപ്പം ചേര്‍ത്തു. പിന്നീട് കളിയുടെ സൂക്ഷ്മതകൾ വശപ്പെടുത്തിയ ഇരുവരും ഇന്ത്യന്‍ ചെസില്‍ തന്നെ വമ്പന്‍ പേരുകാരായി മാറുന്ന കാഴ്‌ചയാണ് കാണാന്‍ കഴിഞ്ഞത്. 2018-ല്‍ തന്‍റെ 12-ാം വയസില്‍ ഗ്രാൻഡ്‌മാസ്റ്റർ പട്ടം നേടാന്‍ പ്രജ്ഞാനന്ദയ്‌ക്ക് കഴിഞ്ഞിരുന്നു. ഈ നേട്ടം കൈവരിക്കുന്ന രാജ്യത്തെ ഏറ്റവും പ്രായം കുറഞ്ഞ താരമാണ് പ്രജ്ഞാനന്ദ.
പിന്നീട് 16-ാം വയസില്‍ എയർതിങ്‌സ് മാസ്‌റ്റേഴ്‌സില്‍ ലോക ചാമ്പ്യൻ മാഗ്നസ് കാള്‍സണെ തകര്‍ത്ത് പ്രജ്ഞാനന്ദ ലോക ശ്രദ്ധ പിടിച്ചുപറ്റി. കഴിഞ്ഞ ചെസ് ലോകകപ്പിന്‍റെ ഫൈനലില്‍ പ്രജ്ഞാനന്ദയോട് ഏറെ വിയര്‍ത്തായിരുന്നു മാഗ്നസ് കാള്‍സണ്‍ വിജയിച്ച് കയറിയത്. ടൈബ്രേക്കറിലായിരുന്നു ഇന്ത്യൻ ഗ്രാൻഡ്‌മാസ്റ്ററെ തോല്‍പ്പിക്കാന്‍ കാൾസന് കഴിഞ്ഞത്.
ALSO READ: 'അർജന്‍റീനയ്ക്കായി ഇനിയും ലോക കിരീടം', 2026ലും ലോകകപ്പ് കളിക്കാൻ ആഗ്രഹമുണ്ടെന്ന് മെസി
