ദുബായ് : സീസണിലെ ആദ്യ മത്സരത്തിനിറങ്ങിയ ലോക ഒന്നാം നമ്പര്‍ ടെന്നിസ് താരം നൊവാക് ജോക്കോവിച്ചിന് വിജയത്തുടക്കം. ദുബായ് ഡ്യൂട്ടി ഫ്രീ ടെന്നിസ് ചാമ്പ്യൻഷിപ്പിൽ, ഇറ്റലിയുടെ ലൊറൻസോ മുസെറ്റിയെയാണ് ജോക്കോ കീഴടക്കിയത്.
74 മിനിട്ട് നീണ്ടുനിന്ന മത്സരത്തില്‍ 6-3, 6-3 എന്ന സ്‌കോറിനാണ് ലോക 58ാം നമ്പർ താരമായ മുസെറ്റിക്കെതിരെ ജോക്കോയുടെ വിജയം. മികച്ച നിലവാരം പുലർത്തുന്ന ഇറ്റാലിയന്‍ താരത്തിനെതിരായ വിജയത്തില്‍ സന്തോഷമുണ്ടെന്ന് ജോക്കോ പ്രതികരിച്ചു.
'മത്സരം മികച്ച അനുഭവമായിരുന്നു. ഇത് നേരിട്ടുള്ള സെറ്റുകൾക്കുള്ള വിജയമാണ്, അതിനാൽ തീർച്ചയായും എനിക്ക് എന്‍റെ ടെന്നിസിൽ തൃപ്തനാകണം, പ്രത്യേകിച്ച് രണ്ടര, മൂന്ന് മാസങ്ങൾ കളിക്കാതിരുന്നതിന് ശേഷം.
തീർച്ചയായും, ഞാൻ മികച്ച രീതിയിൽ കളിച്ച നിമിഷങ്ങളുണ്ട്, പതിവില്ലാതെ തുടർച്ചയായി പിഴവുകൾ വരുത്തിയ നിമിഷങ്ങളുണ്ട്. എന്നാൽ ഒരിടവേളയ്‌ക്ക് ശേഷമുള്ള ആദ്യ മത്സരത്തിൽ ഇത്തരത്തില്‍ സംഭവിക്കുന്നത് സാധാരണമാണ്' ജോക്കോ പറഞ്ഞു.
അതേസമയം വാക്‌സിനെടുക്കാത്തതിനെ തുടര്‍ന്ന് സീസണിലെ ആദ്യ മത്സരമായ ഓസ്‌ട്രേലിയന്‍ ഓപ്പണില്‍ താരത്തിന് കളിക്കാനായിരുന്നില്ല. വാക്‌സിനുമായി ബന്ധപ്പെട്ട പ്രശ്‌നങ്ങള്‍ രൂക്ഷമായതോടെ താരത്തെ സര്‍ക്കാര്‍ നാടുകടത്തുകയും ചെയ്‌തു.
