ലിസ്‌ബൺ : യൂറോ കപ്പ് യോഗ്യത റൗണ്ടിൽ പോർച്ചുഗൽ ഇന്ന് ബോസ്‌നിയയെ നേരിടും. വരാനിരിക്കുന്ന രണ്ട് യോഗ്യത മത്സരങ്ങളിൽ ടീമിൽ ഇടം നേടാനായാൽ അന്താരാഷ്‌ട്ര ഫുട്‌ബോളിലെ അത്യപൂർവ നാഴികക്കല്ല് പിന്നിടാൻ ഒരുങ്ങുകയാണ് പോർച്ചുഗീസ് സൂപ്പർതാരം ക്രിസ്റ്റ്യാനോ റൊണാൾഡോ. അന്താരാഷ്‌ട്ര ഫുട്‌ബോളിൽ 200 മത്സരങ്ങൾ പൂർത്തിയാക്കുന്ന ആദ്യ പുരുഷ താരമെന്ന റെക്കോഡാണ് ക്രിസ്റ്റ്യാനോയെ കാത്തിരിക്കുന്നത്.
കുവൈത്ത് ദേശീയ ടീമിനായി 2003 മുതൽ 2022 വരെയുള്ള കാലയളവിൽ 196 മത്സരങ്ങളിൽ കളത്തിലിറങ്ങിയ ബദ്ർ അൽ മുതവയുടെ റെക്കോഡ് റൊണാൾഡോ നേരത്തെ മറികടന്നിരുന്നു. ഇതിന് പിന്നാലെയാണ് റൊണാൾഡോ 200 മത്സരങ്ങളെന്ന നേട്ടത്തിന് തൊട്ടരികിലെത്തി നിൽക്കുന്നത്. സജീവ ഫുട്‌ബോളിൽ റൊണാൾഡോയുടെ പ്രധാന എതിരാളിയായ ലയണൽ മെസി 175 മത്സരങ്ങളിലാണ് അർജന്‍റീനയ്‌ക്കായി കളത്തിലിറങ്ങിയത്. ഇത്രയും മത്സരങ്ങളിൽ നിന്നും 103 ഗോളുകളാണ് നേടിയിട്ടുള്ളത്.
അതേസമയം ദേശീയ കുപ്പായത്തിൽ കൂടുതൽ മത്സരങ്ങളിൽ കളത്തിലിറങ്ങിയ താരം എന്നതിലപ്പുറം അന്താരാഷ്‌ട്ര ഫുട്‌ബോൾ ചരിത്രത്തിൽ ഏറ്റവും കൂടുതൽ ഗോൾ നേടിയ കളിക്കാരൻ കൂടിയാണ് ക്രിസ്റ്റ്യാനോ റൊണാൾഡോ. പോർച്ചുഗലിനായി ഇതുവരെ 198 മത്സരങ്ങൾ കളിച്ച സൂപ്പർ താരം 122 ഗോളുകളുമായാണ് ഒന്നാം സ്ഥാനം അലങ്കരിക്കുന്നത്.
പോർച്ചുഗലിനായി 133 മത്സരങ്ങൾ കളിച്ച പ്രതിരോധ താരം പെപ്പെയാണ് റൊണാൾഡോയ്‌ക്ക് തൊട്ട് പിന്നിൽ. ഇതിഹാസ താരം ലൂയിസ് ഫിഗോ 112 മത്സരങ്ങളിൽ പറങ്കിപ്പടയ്‌ക്കായി ബൂട്ടണിഞ്ഞു. സ്‌പോർട്ടിങ്, മാഞ്ചസ്റ്റർ യുണൈറ്റഡ്, റയൽ മാഡ്രിഡ്, യുവന്‍റസ്, അൽ-നസ്‌ർ ക്ലബുകൾക്കായി 968 മത്സരങ്ങളിൽ നിന്ന് 837 ഗോളുകൾ നേടിയുട്ടുണ്ട്.
300 മത്സരങ്ങൾ പൂർത്തിയാക്കിയവർ: എന്നാൽ റൊണാൾഡോയ്‌ക്ക് മുമ്പ് തന്നെ അന്താരാഷ്‌ട്ര ഫുട്‌ബോളിൽ ഇരുപതിലധികം വനിത താരങ്ങൾ 200 മത്സരങ്ങൾ പൂർത്തിയാക്കിയിട്ടുണ്ട്. ആകെ താരങ്ങളുടെ പട്ടികയെടുത്താൽ റൊണാൾഡോയുടെ സ്ഥാനം 26-ാമതാണ്. ഏറ്റവും കൂടുതൽ മത്സരങ്ങൾ കളിച്ച താരങ്ങളുടെ പട്ടികയിൽ മുൻ യുണൈറ്റഡ് സ്റ്റേറ്റ്സ് താരങ്ങളാണ് ആധിപത്യം പുലർത്തുന്നത്. മികച്ച ആദ്യ എട്ട് കളിക്കാരിൽ ഏഴ് പേരും അമേരിക്കക്കാരാണ്.
മുൻ യുഎസ് വനിത ടീമംഗമായിരുന്ന ക്രിസ്റ്റിനെ ലില്ലെയാണ് ഏറ്റവും കൂടുതല്‍ അന്താരാഷ്‌ട്ര മത്സരങ്ങൾ കളിച്ചിട്ടുള്ളത്. 1987 മുതൽ 2010 വരെയുള്ള കാലയളവിൽ യുഎസിനായി 354 മത്സരങ്ങളിലാണ് ക്രിസ്റ്റിനെ ലില്ലെ ബൂട്ടണിഞ്ഞത്. രണ്ടാം സ്ഥാനത്തുള്ള കനേഡിയൻ താരം ക്രിസ്റ്റിന സിൻക്ലെയ്‌ർ 323 മത്സരങ്ങൾ കളിച്ചിട്ടുണ്ട്.
