സൂറിച്ച്: ഏറ്റവും പുതിയ ഫിഫ റാങ്കിങ്ങില്‍ 105ാം സ്ഥാനം നിലനിര്‍ത്തി ഇന്ത്യ. ലോകകപ്പ് യോഗ്യതയിലെ അവസാന രണ്ട് മത്സരങ്ങളിലെ പോയിന്‍റാണ് ടീമിന് നേട്ടമായത്. ജൂണില്‍ ഖത്തറില്‍ നടന്ന മത്സരങ്ങളില്‍ വിജയം നേടിയെങ്കിലും ലോകകപ്പ് യോഗ്യത ഉറപ്പിക്കാന്‍ ടീമിന് കഴിഞ്ഞിരുന്നില്ല.
എന്നാല്‍ അഫ്‌ഗാനിസ്ഥാനെതിരായ അവസാന മത്സരത്തില്‍ ഒരു ഗോളിന്‍റെ സമനില പിടിച്ച് 2023ലെ ഏഷ്യന്‍ കപ്പ് യോഗ്യതയുടെ മൂന്നാം റൗണ്ടിലെത്താന്‍ ഇന്ത്യയ്ക്ക് കഴിഞ്ഞിരുന്നു. 1180 പോയിന്‍റോടെയാണ് ടീം റാങ്കിങ് പട്ടികയില്‍ നിലവിലെ സ്ഥാനം നിലനിര്‍ത്തിയത്.
1996 ഫെബ്രുവരിയിലെ 94ാം സ്ഥാനമാണ് ഇന്ത്യയുടെ മികച്ച റാങ്കിങ്. 2015 മാര്‍ച്ചില്‍ 173ാം സ്ഥാനത്തെത്തിയതാണ് ടീമിന്‍റെ ഏറ്റവും മോശം റാങ്കിങ്. ബെൽജിയം ഒന്നാം സ്ഥാനം നിലനിർത്തിയപ്പോൾ ബ്രസീൽ ഒരു സ്ഥാനം മെച്ചപ്പെടുത്തി രണ്ടാം സ്ഥാനത്തേക്ക് കയറി.
also read: ഡ്യൂറൻഡ് കപ്പ് തിരിച്ച് വരുന്നു; സെപ്റ്റംബര്‍ ആദ്യവാരം മുതല്‍ കൊല്‍ക്കത്തയില്‍
ഫ്രാന്‍സും ഇംഗ്ലണ്ടുമാണ് യഥാക്രമം മൂന്നും, നാലും സ്ഥാനങ്ങളിലുള്ളത്. യൂറോ കപ്പ് കിരീട നേട്ടത്തോടെ ഇറ്റലി അഞ്ചാം സ്ഥാനത്തും കോപ്പ അമേരിക്ക കിരീട നേട്ടത്തോടെ അർജന്‍റീന ആറാം സ്ഥാനത്തേക്കും കയറി. സ്പെയ്‌ന്‍, പോര്‍ച്ചുഗല്‍, മെക്സിക്കോ, യുഎസ്എ എന്നിവരാണ് യഥാക്രമം ആദ്യ പത്തില്‍ ഉള്‍പ്പെട്ട മറ്റ് ടീമുകള്‍.
24ാം സ്ഥാനത്തുള്ള ജപ്പാനാണ് ഏഷ്യയില്‍ നിന്നും റാങ്കിങ്ങില്‍ മുന്നിലുള്ള ടീം. ഇറാന്‍ 26ാം സ്ഥാനത്താണ്.
