ലാഹോര്‍: ഏഷ്യ കപ്പ് വേദി പാകിസ്ഥാനില്‍ നിന്നും മാറ്റിയാല്‍ 2023ല്‍ ഇന്ത്യയില്‍ നടക്കുന്ന ഏകദിന ലോകകപ്പില്‍ പങ്കെടുക്കില്ലെന്ന് പാകിസ്ഥാന്‍. നിഷ്‌പക്ഷ വേദിയില്‍ ടൂര്‍ണമെന്‍റ് നടത്തണമെന്ന് ഏഷ്യന്‍ ക്രിക്കറ്റ് കൗണ്‍സിലിനോട് ആവശ്യപ്പെടുമെന്ന് ബിസിസിഐ സെക്രട്ടറി ജയ്‌ ഷ വ്യക്തമാക്കിയിരുന്നു. ഇതിന് പിന്നാലെയാണ് പുതിയ നിലപാടുമായി പാകിസ്ഥാന്‍ ക്രിക്കറ്റ് ബോര്‍ഡ് രംഗത്തെത്തിയത്.
ഏഷ്യ കപ്പിലെ ഇന്ത്യയുടെ പങ്കാളിത്തത്തെ കുറിച്ച് ജയ്‌ ഷ വ്യക്തത വരുത്തിയതിന് പിന്നാലെ പാകിസ്ഥാന്‍ ക്രിക്കറ്റ് ബോര്‍ഡ് അടിയന്തരയോഗം ചേര്‍ന്നിരുന്നു. ഈ യോഗത്തിലാണ് ഏകദിന ലേകകപ്പ് ബഹിഷ്‌കരണം ഉള്‍പ്പടെയുള്ള കാര്യങ്ങള്‍ ചര്‍ച്ചയായത്. ഏഷ്യന്‍ ക്രിക്കറ്റ് കൗണ്‍സിലില്‍ ഇക്കാര്യം ചൂണ്ടിക്കാട്ടി സമ്മര്‍ദ്ധം ചെലുത്താനും പാകിസ്ഥാന്‍ തീരുമാനിച്ചു.
