ഗുവാഹത്തി : ഐപിഎല്ലിന്‍റെ 16ാം സീസണില്‍ തുടര്‍ച്ചയായ മൂന്നാം മത്സരത്തിലും തോല്‍വി വഴങ്ങി ഡല്‍ഹി ക്യാപിറ്റല്‍സ്. ഇന്ന് രാജസ്ഥാന് റോയല്‍സിനെതിരെ 57 റണ്‍സിന്‍റെ തോല്‍വിയാണ് ഡേവിഡ് വാര്‍ണറും സംഘവും വഴങ്ങിയത്. ആദ്യം ബാറ്റ് ചെയ്‌ത രാജസ്ഥാന് ഉയര്‍ത്തിയ 200 റണ്‍സ് ലക്ഷ്യം പിന്തുടര്‍ന്ന ഡല്‍ഹിക്ക് നിശ്ചിത ഓവറില്‍ ഒമ്പത് വിക്കറ്റിന് 142 റണ്‍സെടുക്കാനേ സാധിച്ചുള്ളൂ.
ബോളിങ്ങിലും ബാറ്റിങ്ങിലും ഒരുപോലെ തിളങ്ങിയാണ് സഞ്‌ജു സാംസണിന് കീഴിലിറങ്ങിയ രാജസ്ഥാന് മിന്നും വിജയം പിടിച്ചത്. ഡല്‍ഹിക്കായി 55 പന്തില്‍ 65 റണ്‍സ് നേടിയ ക്യാപ്റ്റന്‍ ഡേവിഡ് വാര്‍ണര്‍ മാത്രമാണ് പൊരുതിയത്. 24 പന്തില്‍ 38 റണ്‍സുമായി ലളിത് യാദവും ഭേദപ്പെട്ട പ്രകടനം നടത്തി.
ബോള്‍ട്ടിളക്കി ബോള്‍ട്ട് : വലിയ ലക്ഷ്യത്തിലേക്ക് ബാറ്റ് വീശാനിറങ്ങിയ ഡല്‍ഹിക്ക് മോശം തുടക്കമായിരുന്നു ലഭിച്ചത്. ട്രെന്‍റ് ബോള്‍ട്ട് എറിഞ്ഞ ആദ്യ ഓവറില്‍ അക്കൗണ്ട് തുറക്കാന്‍ കഴിയാതിരുന്ന ടീമിന് രണ്ട് വിക്കറ്റുകളാണ് നഷ്‌ടമായത്. ഇംപാക്‌ട് പ്ലെയറായെത്തിയ ഡല്‍ഹി ഓപ്പണര്‍ പൃഥ്വി ഷായും മനീഷ് പാണ്ഡെയുമാണ് വന്നപാടെ മടങ്ങിയത്.
മൂന്ന് പന്തുകള്‍ നേരിട്ട പൃഥ്വിയെ രാജസ്ഥാന് നായകന്‍ സഞ്‌ജു സാംസണ്‍ ഒരു തകര്‍പ്പന്‍ ക്യാച്ചിലൂടെ പിടികൂടുകയായിരുന്നു. തുടര്‍ന്നെത്തിയ മനീഷ് പാണ്ഡെയെ നേരിട്ട ആദ്യ പന്തില്‍ തന്നെ ബോള്‍ട്ട് വിക്കറ്റിന് മുന്നില്‍ കുടുക്കി. പിന്നാലെയെത്തിയ റിലീ റോസോവും (12 പന്തില്‍ 14 ) അശ്വിന് മുന്നില്‍ വീണതോടെ സംഘം പ്രതിരോധത്തിലായി.
ഈ സമയം 5.4 ഓവറില്‍ മൂന്നിന് 36 റണ്‍സ് എന്ന നിലയിലായിരുന്നു ഡല്‍ഹി. തുടര്‍ന്ന് ഒന്നിച്ച ഡേവിഡ് വാര്‍ണറും ലളിത് യാദവും ചേര്‍ന്ന് ഡല്‍ഹിയെ മുന്നോട്ട് നയിച്ചു. എന്നാല്‍ 13ാം ഓവറിന്‍റെ അവസാന പന്തില്‍ ലളിതിന്‍റെ കുറ്റി തെറിച്ച് ബോള്‍ട്ട് രാജസ്ഥാനെ തിരികെ എത്തിച്ചു. തുടര്‍ന്നെത്തിയ അക്‌സര്‍ പട്ടേല്‍ (6 പന്തില്‍ 2) റോവ്‍മാൻ പവല്‍ (2 പന്തില്‍ 2), അഭിഷേക് പോറല്‍ (9 പന്തില്‍ 7) എന്നിവരെ മടക്കി രാജസ്ഥാന് ആവേശം വര്‍ധിപ്പിച്ചു.
പിന്നാലെ വാര്‍ണറുടെ പോരാട്ടം യുസ്‌വേന്ദ്ര ചാഹല്‍ അവസാനിപ്പിച്ചു. ആൻറിച്ച് നോർട്ട്ജെയാണ് (0) പുറത്തായ മറ്റൊരു താരം. കുല്‍ദീപ് യാദവ് (7 പന്തില്‍ 3), മുകേഷ് കുമാര്‍ (1 പന്തില്‍ 1) എന്നിവര്‍ പുറത്താവാതെ നിന്നു. രാജസ്ഥാനായി ബോള്‍ട്ടും യുസ്‌വേന്ദ്ര ചാഹലും മൂന്ന് വീതം വിക്കറ്റുകള്‍ വീഴ്‌ത്തിയപ്പോള്‍ ആര്‍ അശ്വിന് രണ്ടും സന്ദീപ് ശര്‍മ ഒരു വിക്കറ്റും നേടി.
ബട്‌ലര്‍, ജയ്‌സ്വാള്‍ വെടിക്കെട്ട്: നേരത്തെ ടോസ് നഷ്‌ടപ്പെട്ട് ആദ്യം ബാറ്റ് ചെയ്‌ത രാജസ്ഥാന് നിശ്ചിത 20 ഓവറില്‍ നാല് വിക്കറ്റ് നഷ്‌ടത്തിലാണ് 199 റണ്‍സെടുത്തത്. ഓപ്പണര്‍മാരായ യശസ്വി ജയ്‌സ്വാള്‍, ജോസ് ബട്‌ലര്‍ എന്നിവരുടെ അര്‍ധ സെഞ്ചുറിയാണ് സംഘത്തെ മികച്ച നിലയില്‍ എത്തിച്ചത്. 51 പന്തില്‍ 79 റണ്‍സെടുത്ത ബട്‌ലറായിരുന്നു രാജസ്ഥാന്‍റെ ടോപ് സ്‌കോറര്‍.
യശസ്വി 31 പന്തില്‍ 60 റണ്‍സാണ് അടിച്ച് കൂട്ടിയത്. രാജസ്ഥാന് ബട്‌ലറും ജയ്‌സ്വാളും ചേര്‍ന്ന് വെടിക്കെട്ട് തുടക്കമാണ് നല്‍കിയത്. ജയ്‌സ്വാളായിരുന്നു കൂടുതല്‍ ആക്രമണകാരി. ഖലീല്‍ അഹമ്മദ് എറിഞ്ഞ ഒന്നാം ഓവറില്‍ തന്നെ അഞ്ച് ഫോറുകള്‍ സഹിതം 20 റണ്‍സായിരുന്നു ജയ്‌സ്വാള്‍ അടിച്ച് കൂട്ടിയത്.
നോർട്ട്ജെ എറിഞ്ഞ രണ്ടാം ഓവറില്‍ മൂന്ന് ഫോറുകള്‍ നേടിയ ബട്‌ലറും താരത്തിനൊപ്പം ചേര്‍ന്നു. ഇതോടെ ആദ്യ നാലോവറില്‍ തന്നെ രാജസ്ഥാന് സ്‌കോര്‍ 50 റണ്‍സില്‍ എത്തി. പവര്‍പ്ലേ പിന്നിടുമ്പോള്‍ വിക്കറ്റ് നഷ്‌ടമില്ലാതെ 68 റണ്‍സായിരുന്നു സംഘത്തിന് നേടാന്‍ കഴിഞ്ഞത്. പിന്നാലെ യശസ്വി ജയ്‌സ്വാള്‍ അര്‍ധ സെഞ്ചുറി നേടി.
25 പന്തുകളില്‍ നിന്നായിരുന്നു താരം സീസണിലെ തന്‍റെ രണ്ടാം അര്‍ധ സെഞ്ചുറി നേടിയത്. ഒന്‍പതാം ഓവറിലെ മൂന്നാം പന്തില്‍ ജയ്‌സ്വാളിനെ റിട്ടേണ്‍ ക്യാച്ചിലൂടെ പുറത്താക്കി മുകേഷ് കുമാറാണ് ഡല്‍ഹിക്ക് കാത്തിരുന്ന ബ്രേക്ക് ത്രൂ നല്‍കിയത്. ഒന്നാം വിക്കറ്റില്‍ ജയ്‌സ്വാളും ബട്‌ലറും ചേര്‍ന്ന് 98 റണ്‍സായിരുന്നു രാജസ്ഥാന്‍റെ ടോട്ടലില്‍ ചേര്‍ത്തത്. തുടര്‍ന്നത്തിയ ക്യാപ്റ്റന്‍ സഞ്‌ജു സാംസണിന് അധികം ആയുസുണ്ടായില്ല.
നാല് പന്തുകള്‍ നേരിട്ട താരം അക്കൗണ്ട് തുറക്കാതെ മടങ്ങി. കുല്‍ദീപ് യാദവിനെ സിക്‌സര്‍ കണ്ടെത്താനുള്ള സഞ്‌ജുവിന്‍റെ ശ്രമം ലോങ്‌ ഓണില്‍ ആന്‍‍റിച്ച് നോര്‍ട്ട്‌ജെയുടെ കയ്യില്‍ ഒതുങ്ങുകയായിരുന്നു. പിന്നാലെയെത്തിയ റിയാന്‍ പരാഗിനെ സാക്ഷിയാക്കി ബട്‌ലര്‍ സീസണിലെ തന്‍റെ രണ്ടാം അര്‍ധ സെഞ്ചുറി തികച്ചു.
ALSO READ: IPL 2023 | ഇതു പറക്കും സഞ്‌ജു; രാജസ്ഥാന് നായകന്‍റെ ഒറ്റക്കയ്യന്‍ ക്യാച്ച് കാണാം
32 പന്തുകളില്‍ നിന്നാണ് താരം അന്‍പത് തികച്ചത്. എന്നാല്‍ പരാഗിനും അധികം ആയുസുണ്ടായിരുന്നില്ല. 11 പന്തില്‍ വെറും ഏഴ് റണ്‍സ് മാത്രം നേടിയ താരത്തെ റോവ്മാന്‍ പവല്‍ കുറ്റി തെറിപ്പിച്ച് തിരിച്ചയയ്‌ക്കുകയായിരുന്നു. 13.5 ഓവറില്‍ മൂന്നിന് 126 റണ്‍സ് എന്ന നിലയിലായിരുന്നു ഈ സമയം രാജസ്ഥാന്.
തുടര്‍ന്ന് ഒന്നിച്ച ബട്‌ലറും ഷിമ്രോണ്‍ ഹെറ്റ്‌മയറും രാജസ്ഥാനെ വീണ്ടും ട്രാക്കിലാക്കി. 19-ാം ഓവറിന്‍റെ മൂന്നാം പന്തിലാണ് ബട്‌ലര്‍ മടങ്ങുന്നത്. നാലാം വിക്കറ്റില്‍ 46 റണ്‍സാണ് ഹെറ്റ്‌മയറിനൊപ്പം ബട്‌ലര്‍ ടീം ടോട്ടലിലേക്ക് ചേര്‍ത്തത്. ഷിമ്രോൺ ഹെറ്റ്‌മെയറും (21 പന്തില്‍ 39), ധ്രുവ് ജൂറലും (3 പന്തില്‍ 8 ) പുറത്താവാതെ നിന്നു.
