മൊഹാലി : ഇന്ത്യന്‍ പ്രീമിയര്‍ ലീഗ് (ഐപിഎല്‍) ക്രിക്കറ്റില്‍ മുംബൈ ഇന്ത്യന്‍സിനെതിരെ പഞ്ചാബ് കിങ്‌സ് ആദ്യം ബാറ്റ് ചെയ്യും. ടോസ് നേടിയ മുംബൈ ഇന്ത്യന്‍സ് നായകന്‍ ബോളിങ് തെരഞ്ഞെടുക്കുകയായിരുന്നു. ഐപിഎല്‍ 16-ാം സീസണിലെ 46-ാം മത്സരമാണിത്. പഞ്ചാബിന്‍റെ തട്ടകമായ മൊഹാലിയിലാണ് കളി നടക്കുന്നത്.
വിക്കറ്റ് മികച്ചതാണെന്ന് മുംബൈ ഇന്ത്യന്‍സ് നായകന്‍ രോഹിത് ശര്‍മ പറഞ്ഞു. എന്താണ് ചെയ്യേണ്ടതെന്ന് ഞാൻ ശിഖർ ധവാനോട് ചോദിച്ചു. ആദ്യം ബൗൾ ചെയ്യൂവെന്നാണ് പറഞ്ഞത്. അതിനാല്‍ ആദ്യം ഞങ്ങള്‍ ബോളിങ് തെരഞ്ഞെടുക്കുകയാണ്.
ഇതൊരു നല്ല പിച്ച് ആണ്, ലക്ഷ്യങ്ങള്‍ മികച്ച രീതിയില്‍ പിന്തുടരാന്‍ ഞങ്ങള്‍ക്ക് കഴിയുന്നുണ്ട്. ഞങ്ങളുടെ ശക്തിയിൽ ഉറച്ചുനിൽക്കുകയാണെന്നും രോഹിത് പറഞ്ഞു. കഴിഞ്ഞ മത്സരത്തിലെ ടീമില്‍ ഒരു മാറ്റവുമായാണ് ഇറങ്ങുന്നതെന്നും മുംബൈ നായകന്‍ അറിയിച്ചു. റിലെ മെറിഡിത്തിന് പരിക്കേറ്റതിനാല്‍ ആകാശ് മധ്‌വാളാണ് പ്ലെയിങ്‌ ഇലവനില്‍ എത്തിയത്. ഇംപാക്‌ട് പ്ലെയേഴ്‌സിന്‍റെ പട്ടികയിലാണ് സൂര്യകുമാര്‍ യാദവുള്ളത്.
ടോസ് ലഭിച്ചിരുന്നുവെങ്കില്‍ തങ്ങൾ ആദ്യം ബോൾ ചെയ്യുമായിരുന്നുവെന്ന് പഞ്ചാബ് കിങ്‌സ് നായകന്‍ ശിഖര്‍ ധവാന്‍ പറഞ്ഞു. വിക്കറ്റ് നല്ലതായി തോന്നുന്നു. ഒരു മികച്ച ടോട്ടല്‍ കണ്ടെത്താനാണ് ലക്ഷ്യം വയ്‌ക്കുന്നതെന്നും ശിഖര്‍ ധവാന്‍ പറഞ്ഞു. കഴിഞ്ഞ മത്സരത്തിലെ പ്ലെയിങ്‌ ഇലവനില്‍ പഞ്ചാബും ഒരു മാറ്റം വരുത്തിയിട്ടുണ്ട്. മാത്യു ഷോര്‍ട്ട് ടീമിലെത്തിയപ്പോള്‍ കാഗിസോ റബാഡയാണ് പുറത്തായത്.
പഞ്ചാബ് കിങ്‌സ് (പ്ലെയിംഗ് ഇലവൻ) : പ്രഭ്‌സിമ്രാൻ സിങ്‌, ശിഖർ ധവാൻ (ക്യാപ്റ്റന്‍), മാത്യു ഷോർട്ട്, ലിയാം ലിവിംഗ്‌സ്റ്റൺ, ജിതേഷ് ശർമ (വിക്കറ്റ് കീപ്പര്‍), സാം കറൻ, ഷാരൂഖ് ഖാൻ, ഹർപ്രീത് ബ്രാർ, ഋഷി ധവാൻ, രാഹുൽ ചഹാർ, അർഷ്‌ദീപ് സിങ്‌.
മുംബൈ ഇന്ത്യൻസ് (പ്ലെയിംഗ് ഇലവൻ): രോഹിത് ശർമ(ക്യാപ്റ്റന്‍), ഇഷാൻ കിഷൻ (വിക്കറ്റ് കീപ്പര്‍), കാമറൂൺ ഗ്രീൻ, തിലക് വർമ, ടിം ഡേവിഡ്, നെഹാൽ വധേര, ജോഫ്ര ആർച്ചർ, പിയൂഷ് ചൗള, കുമാർ കാർത്തികേയ, ആകാശ് മധ്‌വാൾ, അർഷാദ് ഖാൻ.
സീസണില്‍ രോഹിത് ശര്‍മയുടെ മുംബൈ ഇന്ത്യന്‍സ് തങ്ങളുടെ ഒമ്പതാം മത്സരത്തിനിറങ്ങുമ്പോള്‍ ശിഖര്‍ ധവാന്‍റെ പഞ്ചാബ് കിങ്‌സിന് 10-ാം മത്സരമാണ്. കളിച്ച ഒമ്പത് മത്സരങ്ങളില്‍ അഞ്ച് വിജയവുമായി നിലവിലെ പോയിന്‍റ് പട്ടികയില്‍ ആറാമതാണ് പഞ്ചാബ്. എട്ട് മത്സരങ്ങളില്‍ നാല് വിജയവുമായി ഏഴാം സ്ഥാനത്താണ് മുംബൈ ഇന്ത്യന്‍സ്.
കളിച്ച അവസാന മത്സരങ്ങളില്‍ വിജയം നേടിയാണ് പഞ്ചാബ് കിങ്‌സും മുംബൈ ഇന്ത്യന്‍സും എത്തുന്നത്. പഞ്ചാബ് ചെപ്പോക്കില്‍ ചെന്നൈ സൂപ്പര്‍ കിങ്‌സിനെ തോല്‍പ്പിച്ചപ്പോള്‍ സ്വന്തം തട്ടകമായ വാങ്കഡെയില്‍ രാജസ്ഥാന്‍ റോയല്‍സിനെയായിരുന്നു മുംബൈ ഇന്ത്യന്‍സ് കീഴടക്കിയത്. ഈ വിജയം തുടരാനുറച്ചാവും ഇന്ന് ഇരുടീമുകളും ലക്ഷ്യം വയ്‌ക്കുക.
ALSO READ: IPL 2023: കെഎല്‍ രാഹുല്‍ ഐപിഎല്ലില്‍ നിന്നും പുറത്ത്, സ്‌കാനിങിനായി മുംബൈയിലേക്ക്
ഇതിനപ്പുറം സീസണില്‍ നേരത്തെ തമ്മില്‍ ഏറ്റുമുട്ടിയപ്പോള്‍ 13 റണ്‍സിന് പഞ്ചാബ് കിങ്‌സ് വിജയിച്ചിരുന്നു. ഈ കടം കൂടി വീട്ടാനുറച്ചാവും മുംബൈ ഇന്ത്യന്‍സ് ഇറങ്ങുകയെന്നുറപ്പ്. അതേസമയം ഐപിഎല്ലിലെ നേര്‍ക്കുനേര്‍ പോരാട്ടങ്ങളില്‍ ഒപ്പത്തിനൊപ്പമാണ് മുംബൈ ഇന്ത്യന്‍സും പഞ്ചാബ് കിങ്‌സുമുള്ളത്. നേരത്തെ 30 മത്സരങ്ങളിലാണ് പഞ്ചാബ്-മുംബൈ ടീമുകള്‍ പരസ്‌പരം മത്സരിച്ചത്. ഇതില്‍ 15 കളികള്‍ വീതം ഇരു ടീമുകളും വിജയിച്ചിരുന്നു.
