കാണ്‍പൂര്‍ : ന്യൂസിലാന്‍ഡിനെതിരായ ഒന്നാം ടെസ്‌റ്റില്‍ ഇന്ത്യ മികച്ച ലീഡിലേക്ക്. നാലാം ദിനം മൂന്നാം സെഷനിലെ ഡ്രിങ്ക്‌സ് ബ്രേക്കിന് ശേഷം ഇന്ത്യ 79 ഓവറില്‍ ഏഴ്‌ വിക്കറ്റ് നഷ്‌ടത്തില്‍ 221റണ്‍സെടുത്തിട്ടുണ്ട്. 52 റണ്‍സുമായി വൃദ്ധിമാന്‍ സാഹയും 24 റണ്‍സുമായി അക്‌സര്‍ പട്ടേലുമാണ് ക്രീസില്‍. ഇതോടെ രണ്ടാം ഇന്നിങ്‌സില്‍ ഇന്ത്യയ്ക്ക്‌ 270 റണ്‍സ് ലീഡായി.
നാലാം ദിനം തുടക്കത്തില്‍ കൂട്ടത്തകര്‍ച്ച നേരിട്ട ഇന്ത്യയെ ആറാം വിക്കറ്റില്‍ ഒന്നിച്ച ശ്രേയസ് അയ്യര്‍ - ആര്‍. അശ്വിന്‍ സഖ്യമാണ് കരകയറ്റിയത്. 51ന് അഞ്ച് വിക്കറ്റ് എന്ന നിലയില്‍ പരുങ്ങിയ ഇന്ത്യന്‍ ടോട്ടലിലേക്ക് 52 റണ്‍സ് കൂട്ടിച്ചേര്‍ത്ത ശേഷമാണ് ഈ സഖ്യം പിരിഞ്ഞത്. ശ്രേയസ് 65 റണ്‍സും അശ്വിന്‍ 32 റണ്‍സുമെടുത്ത് പുറത്തായി. ചേതേശ്വര്‍ പൂജാര (22), മായങ്ക് അഗര്‍വാള്‍ എന്നിവര്‍ മാത്രമാണ് രണ്ടക്കം കടന്ന മറ്റ് താരങ്ങള്‍.
അതേസമയം കിവീസിനായി ടിം സൗത്തി, കെയ്‌ല്‍ ജാമിസണ്‍ എന്നിവര്‍ മൂന്ന് വിക്കറ്റുകള്‍ വീതം നേടി. അജാസ് പട്ടേല്‍ ഒരു വിക്കറ്റും സ്വന്തമാക്കി. ഒന്നാം ഇന്നിങ്സിൽ ഇന്ത്യ ഉയർത്തിയ 345 റണ്‍സിലേക്ക് ബാറ്റ് വീശിയ ന്യൂസിലാൻഡിനെ 296 റണ്‍സിന് പുറത്താക്കി 49 റണ്‍സിന്‍റെ ലീഡ് ഇന്ത്യ സ്വന്തമാക്കിയിരുന്നു.
also read: IPL Mega Auction : ആര്‍സിബി അടിമുടി മാറും ; നിലനിര്‍ത്തുക കോലിയേയും മാക്‌സ്‌വെലിനെയും
സെഞ്ച്വറി ഓപ്പണിങ് കൂട്ടുകെട്ട് പടുത്തുയർത്തി വമ്പൻ സ്കോറിലേക്ക് നീങ്ങുകയായിരുന്ന കിവീസിനെ അഞ്ച് വിക്കറ്റ് വീഴ്‌ത്തിയ അക്‌സർ പട്ടേലാണ് തകർത്തെറിഞ്ഞത്. മൂന്ന് വിക്കറ്റുകള്‍ നേടിയ ആര്‍. അശ്വിനും തിളങ്ങി.
കിവീസ് നിരയില്‍ ഓപ്പണര്‍മാരായ ടോം ലാഥം (95), വില്‍ യങ് (89) എന്നിവരൊഴികെ മറ്റാര്‍ക്കും മികച്ച പ്രകടനം പുറത്തെടുക്കാനായില്ല. കെയ്‌ന്‍ വില്യംസണ്‍ (18), റോസ് ടെയ്‌ലര്‍ (11), ഹെന്‍ഡ്രി നിക്കോളാസ് (2), രചിന്‍ രവീന്ദ്ര (13), കെയ്‌ല്‍ ജാമിസണ്‍ (23), ടിം സൗത്തി (5), വില്‍ സോമര്‍വില്ലെ (6) എന്നിങ്ങനെയാണ് പുറത്തായ മറ്റ് താരങ്ങളുടെ സംഭാവന. അജാസ് പട്ടേല്‍ (5) പുറത്താവാതെ നിന്നു.
