മുംബൈ: ഇന്ത്യ ആതിഥേയരാവുന്ന ഏകദിന ലോകകപ്പിന് (Cricket World Cup 2023) ഏതാനും മണിക്കൂറുകള്‍ മാത്രമാണ് ശേഷിക്കുന്നത്. ആതിഥേയരായ ഇന്ത്യ ഉള്‍പ്പെടെ പത്ത് ടീമുകളാണ് ലോകകപ്പിനായി പോരടിക്കുന്നത്. ഒക്‌ടോബര്‍ അഞ്ചിന് അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ കഴിഞ്ഞ ലോകകപ്പിലെ ഫൈനലിസ്റ്റുകളായ ഇംഗ്ലണ്ടും ന്യൂസിലന്‍ഡുമാണ് ഉദ്‌ഘാടന മത്സരത്തില്‍ നേര്‍ക്കുനേര്‍ എത്തുക.
ഇപ്പോഴിതാ കിരീടം ആരു നേടുമെന്നത് സംബന്ധിച്ച പ്രവചനുമായി രംഗത്ത് എത്തിയിരിക്കുകയാണ് പ്രമുഖ ജ്യോതിഷിയായ ഗ്രീന്‍സ്റ്റോണ്‍ ലോബോ (Greenstone Lobo). ഇത്തവണത്തെ ഏകദിന ലോകകപ്പ് 1987-ല്‍ ജനിച്ച ക്യാപ്റ്റനുള്ള ടീം നേടുമെന്നാണ് ഗ്രീന്‍സ്റ്റോണ്‍ ലോബോയുടെ ശാസ്‌ത്രീയ പ്രവചനം (Astrologer on Cricket World Cup 2023 Winner). ഒരു പ്രമുഖ ദേശീയ മാധ്യമമാണ് ജ്യോതിഷിയുടെ പ്രവചനം റിപ്പോര്‍ട്ട് ചെയ്‌തിരിക്കുന്നത്.
2011, 2015, 2019 ക്രിക്കറ്റ് ലോകകപ്പുകളിലെ വിജയികളെ ടീമിന്‍റെ ക്യാപ്റ്റന്‍മാര്‍ ജനിച്ച വര്‍ഷവും അവരുടെ ഗൃഹനിലയും നോക്കി താന്‍ കൃത്യമായി പ്രവചിച്ചിരുന്നുവെന്ന് റിപ്പോര്‍ട്ടില്‍ ലോബോ അവകാശപ്പെടുന്നുണ്ട്. "1987ല്‍ ജനിച്ചവരായി രണ്ട് ക്യാപ്റ്റന്മാരാണ് ഈ ലോകകപ്പില്‍ ടീമുകളെ നയിക്കുന്നത്. അതിലൊരാള്‍ ബംഗ്ലാദേശിന്‍റെ ഷാക്കിബ് അൽ ഹസനാണ് (Shakib Al Hasan).
രണ്ടാമത്തെയാള്‍ ഇന്ത്യയുടെ രോഹിത് ശര്‍മയും (Rohit Sharma). ബംഗ്ലാദേശ് അത്ര മികച്ചവരായി തോന്നുന്നില്ല. അതിനാല്‍ നമ്മുടെ രോഹിത് ശര്‍മയാവും ഇത്തവണ ലോകകപ്പ് ഉയര്‍ത്തുക", ലോബോ പ്രവചിച്ചു. ഇന്ത്യയിലെ 10 വേദികളിലായാണ് ഇത്തവണ ലോകകപ്പ് അരങ്ങേറുന്നത്.
ഇന്ത്യ, ഇംഗ്ലണ്ട്, ന്യൂസിലന്‍ഡ്, ബംഗ്ലാദേശ് എന്നീ ടീമുകളെ കൂടാതെ ഓസ്‌ട്രേലിയ, അഫ്‌ഗാനിസ്ഥാൻ, പാകിസ്ഥാൻ, ദക്ഷിണാഫ്രിക്ക, ശ്രീലങ്ക, നെതർലൻഡ്‌സ് എന്നീ ടീമുകളാണ് ടൂര്‍ണമെന്‍റിന്‍റെ ഭാഗമാവുന്നത്. ലോകകപ്പിനെത്തുന്ന 10 ടീമുകളും തമ്മില്‍ പരസ്‌പരം ഓരോ മത്സരങ്ങള്‍ വീതം കളിക്കുന്ന റൗണ്ട് റോബിന്‍ ഫോര്‍മാറ്റിലാണ് ആദ്യ ഘട്ട മത്സരങ്ങള്‍ അരങ്ങേറുക. തുടര്‍ന്ന് ആദ്യ നാലില്‍ എത്തുന്നവര്‍ സെമി ഫൈനലിലേക്ക് മുന്നേറും.
നവംബര്‍ 15-നാണ് മുംബൈയില്‍ ആദ്യ സെമി ഫൈനല്‍ നടക്കും. തുടര്‍ന്ന് കൊല്‍ക്കത്തയില്‍ 16-നാണ് രണ്ടാം സെമി ഫൈനല്‍. ഉദ്‌ഘാടന മത്സരം അരങ്ങേറുന്ന അഹമ്മദാബാദിലെ നരേന്ദ്ര മോദി സ്റ്റേഡിയത്തിലാണ് നവംബര്‍ 19-ന് നടക്കുന്ന ഫൈനലും നടക്കുക. ഒക്‌ടോബര്‍ എട്ടിന് ഓസ്‌ട്രേലിയയ്‌ക്ക് എതിരെയാണ് ഇന്ത്യയുടെ ആദ്യ മത്സരം.
ഇന്ത്യ ഏകദിന ലോകകപ്പ് 2023 സ്ക്വാഡ് (India Squad for cricket world Cup 2023): രോഹിത് ശർമ (ക്യാപ്‌റ്റന്‍), ഇഷാന്‍ കിഷന്‍ (വിക്കറ്റ് കീപ്പര്‍), ഹാര്‍ദിക് പാണ്ഡ്യ, ശുഭ്‌മാൻ ഗിൽ, വിരാട് കോലി, കെഎല്‍ രാഹുല്‍ (വിക്കറ്റ് കീപ്പര്‍), ശ്രേയസ് അയ്യര്‍, സൂര്യകുമാര്‍ യാദവ്, രവീന്ദ്ര ജഡേജ, രവിചന്ദ്രന്‍ അശ്വിന്‍, ശർദുൽ താക്കൂർ, മുഹമ്മദ് ഷമി, കുൽദീപ് യാദവ്, ജസ്പ്രീത് ബുംറ, മുഹമ്മദ് സിറാജ്.
