അക്ഷയ് കുമാറിനെ കേന്ദ്ര കഥാപാത്രമാക്കി രഞ്ജിത് എം. തിവാരി ഒരുക്കുന്ന ബെൽബോട്ടത്തിന്‍റെ റിലീസ് വീണ്ടും നീട്ടിയേക്കുമെന്ന് സൂചന. ഓഗസ്റ്റിലേക്ക് റിലീസ് മാറ്റാനാണ് സാധ്യത. ചില സംസ്ഥാനങ്ങളിൽ വീണ്ടും ലോക്ക്ഡൗൺ ഏർപ്പെടുത്തിയതിന്‍റെയും തിയറ്ററുകൾ ഈ മാസം അവസാനത്തോടെ തുറക്കാനുള്ള സാധ്യത വിദൂരമായതിന്‍റെയും സാഹചര്യത്തിലുമാണ് തീരുമാനം.
ജൂലൈ 27ന് ആഗോളതലത്തിൽ സിനിമയുടെ റിലീസ് ഉണ്ടാകുമെന്ന് അണിയറ പ്രവർത്തകർ അറിയിച്ചിരുന്നു. കൊവിഡ് ഒന്നാം തരംഗത്തിന് ശേഷം വിദേശത്ത് ചിത്രീകരിച്ച ആദ്യ ഇന്ത്യൻ സിനിമയാണ് ബെൽബോട്ടം. കൊവിഡ് മാനദണ്ഡങ്ങൾ പാലിച്ചായിരുന്നു ചിത്രീകരണം.
Also Read: കാഴ്‌ചയുടെ ആഴവും പരപ്പും സൗഹൃദവും... 'സ്വനം' ട്രെയിലർ പുറത്തിറങ്ങി
1980ന്‍റെ പശ്ചാത്തലത്തിൽ ചാരവൃത്തി പ്രമേയമാക്കി ഒരുക്കുന്ന ത്രില്ലർ സിനിമയാണ് ബെൽബോട്ടം. അക്ഷയ് കുമാറിനൊപ്പം ഹുമ ഖുറേഷി, ലാറ ദത്ത എന്നിവരും അഭിനയിക്കുന്ന ചിത്രത്തിൽ വാണി കപൂർ ആണ് നായിക.
വാഷു ഭഗ്നാനി, ജാക്കി ഭഗ്നാനി, ദീപ്‌ശിഖ ദേശ്‌മുഖ്, മോനിഷ അദ്വാനി, നിഖിൽ അദ്വാനി, മധു ഭോജ്വാനി എന്നിവരാണ് നിർമാതാക്കൾ. അസീം അറോറ, പര്‍വീസ് ഷെയ്ഖ് എന്നിവർ ചേർന്നാണ് തിരക്കഥ ഒരുക്കിയിരിക്കുന്നത്.
