വാഷിങ്ടണ്‍: അമേരിക്കൻ ആസ്ഥാനമായി പ്രവർത്തിക്കുന്ന ഗൂഗിൾ ഈ ആഴ്‌ച അവസാനത്തോടെ പിക്‌സൽ 7 സ്‌മാർട്‌ഫോൺ ഔദ്യോഗികമായി പുറത്തിറക്കാൻ ഒരുങ്ങുന്നു. അതോടൊപ്പം കമ്പനിയുടെ ആദ്യത്തെ പിക്‌സൽ വാച്ചും പുറത്തിറങ്ങും. ഹൃദയമിടിപ്പും കായിക പ്രവർത്തനങ്ങളും ട്രാക്ക് ചെയ്യുകയും മാപ്‌സിനും വാലറ്റിനും നേറ്റീവ് പിന്തുണ വാഗ്‌ദാനം ചെയ്യുന്നതുമാണ് പിക്‌സൽ വാച്ചിന്‍റെ സവിശേഷത.
ഫോൺ കോളുകൾ പ്രവർത്തിക്കും എന്നതിലുപരി പൂർണമായും സ്വയം പ്രവർത്തിക്കുന്ന ഇസിം(eSIM) ആണ് സംവിധാനത്തിലുള്ളത്. വ്യത്യസ്‌തമായ സ്‌ട്രാപ്പുകളും മെക്കാനിസവുമുള്ള മൂന്ന് മെറ്റീരിയലുകളാണ് പ്രൊമോയ്‌ക്കായി ഗൂഗിൾ പുറത്തിറക്കിയത്. വാച്ചിന്‍റെ പ്രധാന ബോഡിയുമായി ചേരുന്ന രീതിയിൽ പെയിന്‍റ് ചെയ്‌താണ് വശത്തെ ബട്ടണുകൾ ഒരുക്കിയിട്ടുള്ളത്.
കൂടാതെ, ഫിറ്റ്ബിറ്റ്(Fitbit) ഇപ്പോൾ ഗൂഗിളിന്‍റെ പോർട്ട്‌ഫോളിയോയുടെ ഭാഗമാണ്. ആയതിനാൽ എല്ലാ പിക്‌സൽ വാച്ചുകളിലും ഫിറ്റ്ബിറ്റ് പ്രീമിയത്തിന്‍റെ ആറ് മാസത്തെ മെമ്പർഷിപ്പ് സൗജന്യമായി ലഭിക്കുന്നതായും റിപ്പോർട്ടുകൾ പുറത്തുവന്നു. ഓൺലൈൻ വെബ്‌സൈറ്റായ ജിഎസ്‌എം അരേന(GSM Arena) പുറത്തുവിടുന്ന വിവരങ്ങൾ അനുസരിച്ച് പിക്‌സൽ വാച്ചിൽ ചിത്രങ്ങൾ സംയോജിപ്പിക്കാനും അവ വാൾപ്പേപ്പറായി ഉപയോഗിക്കാനുമുള്ള സംവിധാനം ഉണ്ട്.
ഉപയോക്തൃ ഇന്‍റർഫേസിൽ സ്‌മാർട്ട് ഹോം കൺട്രോളുകളും എമർജൻസി എസ്ഒഎസ് കോളിംഗും ഉണ്ടെന്നതും പിക്‌സൽ വാച്ചിന്‍റെ മറ്റു സവിശേഷതകളാണ്.
