വാഷിങ്‌ടണ്‍: മിയാമി ബീച്ചിന് സമീപത്തുള്ള കെട്ടിടം തകര്‍ന്നുണ്ടായ അപകടത്തില്‍ 8 പേരുടെ മൃതദേഹം കൂടി കണ്ടെത്തി. ഇതോടെ അപകടത്തില്‍ മരിച്ചവരുടെ എണ്ണം 54 ആയി. 86 പേരെ ഇനിയും കണ്ടെത്താനുണ്ടെന്ന് മിയാമി ഡെയ്‌ഡ്‌ കൗണ്ടി മേയർ ഡാനിയേല ലീവൈൻ കാവ പറഞ്ഞു. അപകട കാരണം ഇപ്പോഴും അവ്യക്തമാണെന്നും ലീവൈൻ കാവ അറിയിച്ചു.
തകർന്ന ഷാംപ്ളെയിൻ ടവേഴ്സ് കൊണ്ടോ കെട്ടിടത്തിന്‍റെ ശേഷിച്ച ഭാഗങ്ങൾ സ്‌ഫോടക വസ്‌തുക്കൾ ഉപയോഗിച്ച്‌ ഞായറാഴ്ച പൊളിച്ച് നീക്കിയിരുന്നു. തുടര്‍ന്ന് നിര്‍ത്തിവച്ച തെരച്ചില്‍ പുനരാരംഭിക്കുകയായിരുന്നു. ജൂണ്‍ 25നാണ് അപകടമുണ്ടായത്. 12 നിലകളുള്ള കോപ്ലക്സിലെ 136 യൂണിറ്റുകളിൽ പകുതിയോളം ആണ് തകർന്നു വീണത്.
40 വർഷം പഴക്കമുള്ള കെട്ടിടം കുറെ വർഷമായി അൽപാൽപം താഴുന്നതായി വിദഗ്ധ പരിശോധനയിൽ കണ്ടെത്തിയിരുന്നു. തകർച്ചയ്ക്ക് കാരണമായത് എന്താണെന്ന് എഞ്ചിനീയർമാർ പരിശോധിക്കുന്നുണ്ടെങ്കിലും കൃത്യമായ കാരണം നിർണയിക്കാൻ സമയമെടുക്കുമെന്ന് ഫ്ലോറിഡ ഗവർണർ റോൺ ഡിസാന്‍റിസ് നേരത്തെ പറഞ്ഞിരുന്നു.
Also Read: കശ്‌മീരിൽ 24 മണിക്കൂറിൽ മൂന്ന് ഏറ്റുമുട്ടൽ; അഞ്ച് തീവ്രവാദികളെ സൈന്യം വധിച്ചു
