ഇക്കുറി രണ്ട് ഓസ്‌കര്‍ അവാര്‍ഡുകളാണ് ഇന്ത്യയ്‌ക്ക് ലഭിച്ചത്. രാജമൗലിയുടെ ബ്രഹ്മാണ്ഡ ചിത്രം 'ആര്‍ആര്‍ആറി'ലൂടെയും 'ദി എലിഫന്‍റ്‌ വിസ്‌പറേഴ്‌സി'ലൂടെയും 95ാമത് അക്കാദമി അവാര്‍ഡില്‍ രണ്ട് അവാര്‍ഡുകള്‍ സ്വന്തമാക്കി ഇന്ത്യ ചരിത്രം കുറിച്ചു. മികച്ച ഒറിജിനൽ ഗാനത്തിനുള്ള പുരസ്‌കാരം 'ആര്‍ആര്‍ആറി'ലെ 'നാട്ടു നാട്ടു' ഗാനം നേടിയപ്പോള്‍, മികച്ച ഹ്രസ്വ ഡോക്യുമെന്‍ററിയ്‌ക്കുള്ള പുരസ്‌കാരമാണ് 'ദി എലിഫന്‍റ്‌ വിസ്പറേഴ്സ്' സ്വന്തമാക്കിയത്..
ഗാന രചയിതാവ് ചന്ദ്രബോസിനൊപ്പം ഓസ്‌കര്‍ പുരസ്‌കാരം സ്വീകരിച്ച ശേഷം ഓസ്‌കര്‍ വേദിയില്‍ സംഗീത സംവിധായകൻ എംഎം കീരവാണി ഗംഭീരമായ പ്രഭാഷണം നടത്തിയിരുന്നു. മികച്ച ഡോക്യുമെന്‍ററിയില്‍ വിജയം നേടിയ ഗുനീത് മോംഗയ്‌ക്ക് ഓസ്‌കര്‍ വേദിയില്‍ സംസാരിക്കാനുള്ള സമയം വെട്ടിച്ചുരുക്കിയത് ഏവരെയും അത്ഭുതപ്പെടുത്തി. ഗുനീത് മോംഗയുടെ ഡോക്യുമെന്‍ററി ഓസ്‌കര്‍ നേടിയ അവസരത്തില്‍ ഓസ്‌കര്‍ വേദിയില്‍ ഗുനീത് മോംഗയ്‌ക്ക് പ്രസംഗിക്കാനുള്ള സമയം വെട്ടിച്ചുരുക്കിയത് സോഷ്യല്‍ മീഡിയയില്‍ വലിയ വിവാദങ്ങള്‍ക്കും തുടക്കമിട്ടു.
'സംഭവിച്ചത് ഇതാണ്', വെളിപ്പെടുത്തി കീരവാണി: സംഭവത്തെ കുറിച്ച് ഓസ്‌കര്‍ ജേതാവ് എംഎം കീരവാണി ഞെട്ടിപ്പിക്കുന്ന ഒരു വെളിപ്പെടുത്തൽ നടത്തി. അടുത്തിടെ ഒരു മാധ്യമത്തിന് നല്‍കിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. അവാർഡ് സ്വീകരിച്ച ഉടൻ തന്നെ ഗുനീത് മോംഗയെ ആശുപത്രിയിൽ പ്രവേശിപ്പിക്കാനുണ്ടായ സാഹചര്യമാണ് കീരവാണി പങ്കുവച്ചത്. ശ്വാസ തടസം അനുഭവപ്പെട്ടതിനെ തുടർന്നാണ് മോംഗയെ ആശുപത്രിയിൽ പ്രവേശിപ്പിച്ചതെന്ന് കീരവാണി പറഞ്ഞു.
'പ്രപഞ്ചം എന്‍റെ പ്രാർഥന കേൾക്കുകയും അത് സംഭവിക്കുകയും ചെയ്‌തു. ആശ്ചര്യം ഉണ്ടായിരുന്നെങ്കിലും അത് എന്നെ അത്ര വലിയ ആവേശത്തില്‍ ഒന്നും എത്തിച്ചില്ല. എന്നാൽ മറ്റൊരു അവാർഡ് ജേതാവായ ഗുനീത് മോംഗയുടെ കാര്യത്തില്‍, അവര്‍ക്ക് വേദിയില്‍ സംസാരിക്കാന്‍ സമയം ലഭിച്ചില്ല. അതിനാല്‍ അവര്‍ക്ക് ശ്വാസം മുട്ടി, ആശുപത്രിയില്‍ പ്രവേശിപ്പിച്ചു' -ഓസ്‌കര്‍ പുരസ്‌കാരം ലഭിച്ചതിലുള്ള ആവേശം പങ്കുവച്ച് കീരവാണി പറഞ്ഞു.
ഗുനീത് മോംഗയുടെ പ്രതികരണം: അതേസമയം തന്‍റെ ഓസ്‌കർ പ്രസംഗം വെട്ടിക്കുറച്ചതിനെ കുറിച്ച് ഗുനീത് മോംഗയും പ്രതികരിക്കുന്നുണ്ട്. ബോംബെ ടൈംസിന് നൽകിയ അഭിമുഖത്തിലാണ് ഗുനീത് മോംഗ ഇതേകുറിച്ച് വ്യക്തമാക്കുന്നത്. ഓസ്‌കര്‍ നേടിയ ശേഷം തന്‍റെ വികാരങ്ങൾ വാക്കുകളിലൂടെ പ്രകടിപ്പിക്കാന്‍ പൂർണമായും അനുവദിക്കാത്തതിൽ താൻ അൽപം അസ്വസ്ഥയാണെന്ന് ഗുനീത് മോംഗ പറഞ്ഞു.
'എന്‍റെ മുഖത്ത് ഒരു ഞെട്ടൽ ഉണ്ടായിരുന്നു. ഒരു ഇന്ത്യൻ നിര്‍മാണത്തിലെ ഇന്ത്യയിലെ ആദ്യത്തെ ഓസ്‌കർ ഇതാണെന്ന് പറയാൻ ഞാൻ ആഗ്രഹിച്ചു. ഇത് വളരെ വലിയൊരു കാര്യമാണ്. അത്രയും ദൂരം പോയിട്ടും അത് പറയാന്‍ സാധിക്കാത്തത് എന്‍റെ ഹൃദയമിടിപ്പ് കൂട്ടി. ഞാന്‍ ഒന്നുകൂടി അവിടെ എത്തി അത് പറയും.
എനിക്ക് സംസാരിക്കാൻ സമയം നല്‍കാത്ത അക്കാദമിയെ പാശ്ചാത്യ മാധ്യമങ്ങൾ ഉയർത്തിക്കാട്ടുന്നു. എന്‍റെ പ്രസംഗം നടത്താൻ എനിക്ക് അവസരം ലഭിക്കാത്തതില്‍ ആളുകൾ അസ്വസ്ഥരായിരുന്നു. എനിക്ക് സംസാരിക്കാൻ അവസരം ലഭിക്കാത്തതില്‍ നിരാശ പ്രകടിപ്പിക്കുന്ന വീഡിയോകളും ട്വീറ്റുകളും സോഷ്യല്‍ മീഡിയയില്‍ വൈറലാവുകയാണ്. എന്നിൽ നിന്നും ഇന്ത്യയെ അപഹരിച്ചെടുത്ത നിമിഷമായിരുന്നു അത്.' -ഗുനീത് മോംഗ പറഞ്ഞു.
പുരസ്‌കാരം സ്വീകരിച്ച ശേഷം എംഎം കീരവാണി സ്‌റ്റേജിലെത്തി ഒരു ഗാനം ആലപിച്ചിരുന്നു. ഓസ്‌കര്‍ പുരസ്‌കാരം തന്‍റെ കുടുംബത്തിനും തന്‍റെ രാജ്യമായ ഇന്ത്യയ്ക്കും അദ്ദേഹം സമർപ്പിച്ചു. 'ടോപ്പ് ഓഫ് ദ വേൾഡ്' എന്ന ഗാനത്തിന്‍റെ താളത്തിലാണ് കീരവാണി തന്‍റെ സ്വീകാര്യത പ്രസംഗം നടത്തിയത്. 'കാര്‍പെന്‍റേഴ്‌സ്' കേട്ടാണ് ഞാന്‍ വളര്‍ന്നത്. ഇന്നിതാ ഞാന്‍ ഓസ്‌കറില്‍ എത്തിയിരിക്കുന്നു. എന്‍റെ മനസിൽ ഒരേയൊരു ആഗ്രഹമേ ഉണ്ടായിരുന്നുള്ളൂ. രാജമൗലിയുടെയും ഞങ്ങളുടെ കുടുംബത്തിന്‍റെയും 'ആര്‍ആര്‍ആര്‍' വിജയിക്കണം' -എംഎം കീരവാണി പറഞ്ഞു.
'ആര്‍ആര്‍ആര്‍' തിയേറ്ററുകളിൽ റിലീസ് ചെയ്‌തിട്ട് ഒരു വർഷം തികയുകയാണ്. 2022 മാര്‍ച്ച് 25നാണ് ചിത്രം തിയേറ്ററുകളില്‍ എത്തിയത്.
Also Read: കീരവാണിക്ക് ഓസ്‌കറിനേക്കാള്‍ മികച്ച സമ്മാനം; കണ്ണീര്‍ നിയന്ത്രിക്കാനാവാതെ കീരവാണി
