തിരുനൽവേലി(തമിഴ്‌നാട്) : സ്ഥിരമായി മദ്യപിച്ചെത്തി മർദിക്കുന്ന ഭർത്താവിനെ വിഷം നൽകി കൊലപ്പെടുത്തിയ സംഭവത്തിൽ ഭാര്യ അറസ്‌റ്റിൽ. തമിഴ്‌നാട്ടിലെ തിരുനൽവേലിയിലാണ് സംഭവം. തിസയൻവിള സ്വദേശി ജയകോടിയാണ് പിടിയിലായത്.
ജയകോടിയുടെ ഭർത്താവ് ശിങ്കാരവേലൻ സ്ഥിരമായി മദ്യപിക്കുന്നയാളാണ്. ഇയാൾ മദ്യപിച്ചെത്തി വഴക്കിടുന്നതും മർദിക്കുന്നതും പതിവാണ്. ഈ ക്രൂരത സഹിക്കാനാവാതെയാണ് ജയകോടി ഭർത്താവിന് വിഷം നൽകി കൊലപ്പെടുത്താൻ തീരുമാനിച്ചതെന്ന് പൊലീസ് പറഞ്ഞു.
കഴിഞ്ഞ ഞായറാഴ്‌ചയാണ് (2-10-2022) കേസിനാസ്‌പദമായ സംഭവം. ഇവരുടെ വീട്ടിലെത്തിയ ശിങ്കാരവേലന്‍റെ അമ്മയാണ് ഇയാൾ കിടപ്പുമുറിയിൽ ബോധരഹിതനായി കിടക്കുന്നത് കണ്ടത്. ഉടൻ തന്നെ സമീപത്തെ സർക്കാർ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
തുടർന്ന് ശിങ്കാരവേലന്‍റെ അമ്മ മരണത്തിൽ ദുരൂഹതയുണ്ടെന്ന് ആരോപിച്ച് പൊലീസിൽ പരാതി നൽകി. ഈ പരാതിയിൽ പൊലീസ് നടത്തിയ അന്വേഷണത്തിലാണ് ജയകോടി പിടിയിലായത്. ഭർത്താവിനുള്ള ഭക്ഷണത്തിൽ വിഷം ചേർത്ത് നൽകിയാണ് കൊലപ്പെടുത്തിയതെന്ന് ജയകോടി മൊഴി നൽകിയതായി ഉവാരി പൊലീസ് പറഞ്ഞു.
