ന്യൂഡല്‍ഹി: ചൈന ആസ്ഥാനമായുള്ള ലോൺ ആപ്പുമായി ചേർന്ന് റിസർവ് ബാങ്ക് ഓഫ് ഇന്ത്യയുടെ രജിസ്‌ട്രേഷൻ സർട്ടിഫിക്കറ്റ് ചൂഷണം ചെയ്യാനും നിയമ ലംഘനങ്ങൾ നടത്താനും പിസി ഫിനാൻഷ്യൽ സർവീസസ് (പിസിഎഫ്എസ്) പ്രവർത്തിച്ചതായി എൻഫോഴ്‌സ്‌മെന്‍റ് ഡയറക്‌ടറേറ്റ്. ചൈനയിലെ ഏറ്റവും വലിയ ഓൺലൈൻ ഗെയിം ഡെവലപ്പറും വിതരണക്കാരനുമായ കുൻലുൻ ടെക്കിന്‍റെ തലവൻ ഷൗ യാഹുയിയുടെ നിയന്ത്രണത്തിലാണ് പിസിഎഫ്എസ് എന്നും ഇഡി കണ്ടെത്തിയിട്ടുണ്ട്.
പിസിഎഫ്‌എസിലേക്ക് ചൈനീസ് സ്ഥാപനം അനധികൃത രീതിയിൽ വിദേശ ഫണ്ട് വകമാറ്റിയതായും പിന്നീട് ചൈന, ഹോങ്കോങ്, തായ്‌വാൻ, സിംഗപ്പൂർ എന്നിവിടങ്ങളിലേക്ക് തിരികെ മാറ്റിയതായും ഇഡി അടുത്തിടെ കണ്ടെത്തി. മൊബൈൽ ആപ്പ് അടിസ്ഥാനമാക്കിയുള്ള വായ്‌പ പ്രവർത്തനങ്ങളിലൂടെ പിസിഎഫ്എസ് കെവൈസി(KYC) മാനദണ്ഡങ്ങൾ ലംഘിച്ചു എന്നും ഇഡി കണ്ടെത്തിയിട്ടുണ്ട്.
ഉപഭോക്താക്കൾക്ക് ഭീഷണി
കാഷ്ബീൻ എന്ന ആപ്പ് വഴിയാണ് ഇവർ വായ്‌പ പ്രവർത്തനങ്ങൾ നടത്തിയത്. കമ്പനി പ്രതിനിധികൾ ഓൺലൈനായി അപേക്ഷകൾ ശേഖരിക്കുകയും വായ്‌പ അനുവദിക്കുകയും ചെയ്യും. പ്രോസസിങ് ഫീസായി വായ്‌പ തുകയുടെ 15 മുതൽ 25 ശതമാനം വരെ മുൻകൂറായി അടയ്ക്കാൻ അവർ ഉപഭോക്താക്കളോട് ആവശ്യപ്പെടും.
പണം അടച്ചില്ലെങ്കിൽ 1500 മുതൽ 2000 ശതമാനം വരെ പലിശ നൽകുകയും കടം വാങ്ങുന്നവരെ കോൾ സെന്‍റർ വഴി ഭീഷണിപ്പെടുത്തുകയും അസഭ്യം പറയുകയും ചെയ്തിരുന്നതായും ഇഡി വ്യക്‌തമാക്കി. ഇതിലൂടെ ഒരു വർഷം 11,717 കോടി രൂപ കമ്പനികൾ വെളുപ്പിച്ചതായും ഇഡി കണ്ടെത്തിയിട്ടുണ്ട്.
ALSO READ: യുക്രൈന് ലോകബാങ്കിന്‍റെ സഹായം ; 3 ബില്യണ്‍ ഡോളറിന്‍റെ അടിയന്തര പാക്കേജ് പ്രഖ്യാപിച്ചു
അതേസമയം വ്യാജ ഫ്ലൈറ്റ് ടിക്കറ്റുകളും ക്ലൗഡ് സിസിടിവി സ്റ്റോറേജ് റെന്‍റൽ ചാർജ് ഇൻവോയ്‌സുകളും നിർമ്മിച്ച് കമ്പനി വിദേശത്തേക്ക് പണം വകമാറ്റിയതായും ഇഡി അന്വേഷണത്തിൽ കണ്ടെത്തി. സ്റ്റേറ്റ് ബാങ്ക് ഓഫ് ഇന്ത്യയുടെയും മുംബൈയിലെയും എസ്ബിഎം ബാങ്കിന്‍റെ ചില ശാഖകൾ വഴിയുമാണ് ഇവർ പണം കടത്തിയത്.
തെലങ്കാനയിൽ മാത്രം 300 കോടി രൂപയാണ് ലോൺ ആപ്പുകൾ കൊള്ളയടിച്ചത്. സൈബർ തട്ടിപ്പുകൾ വർധിക്കുന്ന സാഹചര്യത്തിൽ തെലങ്കാന പൊലീസ് അതീവ ജാഗ്രതയിലാണ്. ക്യാഷ് ബീയിങ്, ഈസി ലോൺ, ലക്കി റുപ്പി, ഇൻഫിനിറ്റി ക്യാഷ്, മിനിറ്റ് ക്യാഷ് എന്നിവ കൂടാതെ 150 ലോണ്‍ ആപ്പുകൾ ഇതിനകം പൊലീസ് തിരിച്ചറിഞ്ഞിട്ടുണ്ട്
