'കെപിസിസി പ്രസിഡന്‍റ് സംസാരിയ്ക്കുന്നത് തെരുവുഗുണ്ടയുടെ ഭാഷയില്‍' ; സുധാകരനെതിരെ വിജയരാഘവന്‍

'കോൺഗ്രസ് ക്രിമിനൽ സ്വഭാവത്തിലേക്ക് മാറുന്നതിന്‍റെ ഭാഗമായുള്ള വാക്കുകളാണ് സുധാകരന്‍റെ ഭാഗത്ത് നിന്ന് വരുന്നത്'

തിരുവനന്തപുരം : മുഖ്യമന്ത്രി പിണറായി വിജയന്‍ - കെ സുധാകരൻ പോരിൽ കെപിസിസി പ്രസിഡന്‍റിനെതിരെ രൂക്ഷ വിമര്‍ശനവുമായി സിപിഎം സംസ്ഥാന സെക്രട്ടറി എ വിജയരാഘവൻ. തെരുവുഗുണ്ടയുടെ ഭാഷയിലാണ് കെ സുധാകരന്‍ സംസാരിക്കുന്നതെന്ന് എ വിജയരാഘവൻ പറഞ്ഞു.

കുറച്ചുദിവസമായി കെപിസിസി അധ്യക്ഷന്‍റെ വികട ഭാഷണം കേൾക്കുന്നു. കേരളത്തിലെ ജനങ്ങൾ ഇതിനെ പിന്തുണയ്ക്കില്ലെന്നും വിജയരാഘവന്‍ പറഞ്ഞു. സുധാകരനെ കെപിസിസി അധ്യക്ഷനായി നിയമിച്ചവരാണ് ഇതിന് മറുപടി പറയേണ്ടത്.

കോൺഗ്രസ് ക്രിമിനൽ സ്വഭാവത്തിലേക്ക് മാറുന്നതിന്‍റെ ഭാഗമായുള്ള വാക്കുകളാണ് സുധാകരന്‍റെ ഭാഗത്തുനിന്ന് വരുന്നത്. കേരളം കാത്തുസൂക്ഷിക്കുന്ന രാഷ്ട്രീയ മര്യാദയ്‌ക്കെതിരാണ് കെ സുധാകരന്‍റെ രീതിയെന്നും എ വിജയരാഘവൻ പറഞ്ഞു.