കോഴിക്കോട്: മുസ്ലീം തീവ്രവാദി സംഘടനയാണ് മാവോയിസ്റ്റുകളെ സഹായിക്കുന്നതെന്ന സി.പി.എം ജില്ലാ സെക്രട്ടറി പി. മോഹനന്റെ ആരോപണത്തിനെതിരെ മുസ്ലീം ലീഗ് ജില്ലാ നേതൃത്വം. ഏത് മുസ്ലീം സംഘടനയാണ് മാവോയിസ്റ്റുകളെ സഹായിക്കുന്നതെന്ന് സി.പി.എം വ്യക്തമാക്കണമെന്ന് മുസ്ലീം ലീഗ് ജില്ലാ പ്രസിഡന്റ് ഉമ്മര്‍ പാണ്ടികശാല പറഞ്ഞു. നിഴലിന് നേരെ വെടി വെയ്ക്കാതെ ആരോപണം വ്യക്തമാക്കണമെന്നും ഉമ്മര്‍ തുറന്നടിച്ചു.
സി.പി.എം ഇന്ന് മാവോയിസ്റ്റുകളുടെ അഭയകേന്ദ്രമായി മാറിയിരിക്കുകയാണ്. ഇത് പാര്‍ട്ടിക്കുള്ളില്‍ തന്നെ പ്രതിസന്ധിക്ക് കാരണമായിട്ടുണ്ട്. നേരിടുന്ന പ്രതിസന്ധി മറച്ചുവെക്കാനാണ് സി.പി.എം തീവ്ര മുസ്ലീം സംഘടനകളുടെ പേര് വലിച്ചിഴക്കുന്നതെന്നും ലീഗ് ജില്ലാ നേതൃത്വം കുറ്റപ്പെടുത്തി.
