എറണാകുളം: തിരുവനന്തപുരം നഗരത്തിലെത്തുന്ന സ്ത്രീകൾക്കും കുട്ടികൾക്കും സുരക്ഷിത താമസ സൗകര്യമൊരുക്കുന്ന ‘എന്‍റെ കൂട്’ പദ്ധതിക്ക് എറണാകുളത്ത് തുടക്കം. സംസ്ഥാന വനിത ശിശു വികസന വകുപ്പിന്‍റെ കീഴിൽ കാക്കനാട് ഐ.എം.ജി ജംങ്ഷന് സമീപം നിര്‍ഭയ കെട്ടിടത്തിന്‍റെ ഒന്നാം നിലയിലാണ് എൻ്റെ കൂട് പ്രവര്‍ത്തനമാരംഭിക്കുന്നത്.
പരീക്ഷകള്‍, അഭിമുഖം, ചികിത്സ തുടങ്ങിയ ആവശ്യങ്ങള്‍ക്കായി എത്തി അന്നുതന്നെ മടങ്ങാൻ സാധിക്കാത്ത വനിതകള്‍ക്ക് എൻ്റെ കൂടില്‍ താമസിക്കാം. ജില്ലയുടെ ഭരണ സിരാകേന്ദ്രം എന്നതിനു പുറമെ ഇൻഫോപാര്‍ക്ക്, പ്രത്യേക സാമ്പത്തിക മേഖല, വിവിധ വ്യവസായ കേന്ദ്രങ്ങള്‍ എന്നിവ കാക്കനാട് സ്ഥിതി ചെയ്യുന്നതിനാല്‍ നിരവധി സ്ത്രീകള്‍ക്ക് ഈ കേന്ദ്രത്തിന്‍റെ സൗകര്യം ഉപയോഗപ്പെടുത്താൻ കഴിയും.
വൈകിട്ട് അഞ്ചു മുതല്‍ രാവിലെ 7 വരെയാണ് കേന്ദ്രത്തിന്‍റെ പ്രവര്‍ത്തനം. പരമാവധി 20 പേര്‍ക്ക് ഒരു സമയം ഇവിടെ താമസിക്കാം. സൗജന്യ താമസത്തിനു പുറമെ രാത്രി സൗജന്യ ഭക്ഷണവും ലഭിക്കും. രണ്ട് മള്‍ട്ടി ടാസ്‌കിങ് കെയര്‍ ടേക്കര്‍മാരേയും ഒരു ശുചീകരണ തൊഴിലാളികളേയും കേന്ദ്രത്തില്‍ നിയോഗിക്കും.
സ്ത്രീകള്‍, പെണ്‍കുട്ടികള്‍, 12 വയസിന് താഴെ പ്രായമുള്ള ആണ്‍കുട്ടികള്‍ എന്നിവര്‍ക്കായിരിക്കും ഇവിടെ താമസിക്കാൻ സാധിക്കുന്നത്. മാസത്തില്‍ പരമാവധി മൂന്നു ദിവസം വരെ സൗജന്യമായി എൻ്റെ കൂടിന്‍റെ താമസ സൗകര്യം ഒരാൾക്ക് ഉപയോഗപ്പെടുത്താം. അധികമായി വരുന്ന ഓരോ ദിവസത്തിനും 150 രൂപ നല്‍കണം എന്നതാണ് നിബന്ധന.
