ആലപ്പുഴ: ബി.ജെ.പിയുടെ മുതിര്‍ന്ന നേതാവും മുന്‍ ഉപപ്രധാനമന്ത്രിയുമായ എല്‍.കെ. അദ്വാനിയും കുടുംബവും മാരാരിക്കുളം മഹാദേവ ക്ഷേത്രത്തില്‍ ദര്‍ശനം നടത്തി. അതീവ സുരക്ഷാ ക്രമീകരണങ്ങളാണ് അദ്ദേഹത്തിനും കുടുംബത്തിനുമായി ഒരുക്കിയത്. ദീപാരാധന തൊഴുത ശേഷം പ്രധാന വഴിപാടായ രുദ്രാഭിഷേകവും നടത്തി. ക്ഷേത്ര ഭരണസമിതി 51 രുദ്രാക്ഷവും നടരാജവിഗ്രഹവും അദ്ദേഹത്തിന് സമ്മാനിച്ചു. ഒരാഴ്‌ചത്തെ ആലപ്പുഴ സന്ദര്‍ശനത്തിനായി കഴിഞ്ഞ ദിവസമാണ് അദ്ദേഹവും കുടുംബവും എത്തിയത്.
മാരാരിക്കുളം റിസോര്‍ട്ടിലാണ് താമസ സൗകര്യം ഒരുക്കിയത്. റിസോര്‍ട്ടില്‍ അടുത്ത ദിവസം വിപുലമായ ഓണാഘോഷം ഒരുക്കിയിട്ടുണ്ട്. ഓണക്കാലത്ത് കേരളത്തില്‍ എത്താനായതില്‍ സന്തോഷമുണ്ടെന്ന് അദ്ദേഹത്തിന്‍റെ കുടുംബാംഗങ്ങള്‍ പ്രതികരിച്ചു. അദ്വാനി എത്തിയതറിഞ്ഞ് ബി.ജെ.പി. നേതാക്കളടക്കം നിരവധി ആളുകള്‍ മാരാരിക്കുളം മഹാദേവ ക്ഷേത്രത്തില്‍ അദ്ദേഹത്തെ കാണാന്‍ എത്തി.
