ആലപ്പുഴ: മന്ത്രി കെ.ടി ജലീലിനെതിരെ ഉയർന്ന ആരോപണങ്ങൾ സംസ്ഥാന സർക്കാരിന്‍റെ സൽപ്പേരിനെ ഒരു തരത്തിലും ബാധിക്കില്ലെന്ന് പൊതുമരാമത്ത് മന്ത്രി ജി. സുധാകരൻ.
ചരിത്രത്തിൽ ഇന്നേവരെ ഇല്ലാത്തവിധമുള്ള വികസന - ക്ഷേമ പ്രവർത്തനങ്ങളാണ് പിണറായി വിജയൻ നേതൃത്വം നൽകുന്ന എൽഡിഎഫ് സർക്കാർ സംസ്ഥാനത്ത് നടത്തുന്നത്. കഴിഞ്ഞ സർക്കാരിന്‍റെ കാലത്ത് 9 മുതൽ 11 മാസം വരെ കുടിശികയുണ്ടായിരുന്ന 600 രൂപ ക്ഷേമ പെൻഷൻ ഈ സർക്കാർ അധികാരത്തിലേറി കഴിഞ്ഞ നാല് വർഷക്കാലം കൊണ്ട് കുടിശിക വരുത്താതെ 1400 രൂപയായി ഉയർത്തിയ പ്രവർത്തനങ്ങൾ ഉൾപ്പടെയുളളവ ഈ ജനത്തിന് ബോധ്യമുള്ള കാര്യമാണെന്നും അദ്ദേഹം ചൂണ്ടിക്കാട്ടി. മന്ത്രിക്കെതിരായി ഉയർന്ന ആരോപണത്തിന്‍റെ കാര്യത്തിൽ സിപിഎം പോളിറ്റ് ബ്യൂറോയും സംസ്ഥാന സെക്രട്ടറിയേറ്റും നിലപാട് വ്യക്തമാക്കിയിട്ടുണ്ട്. അത് തന്നെയാണ് താൻ ഉൾപ്പടെയുള്ളവരുടെ നിലപാടെന്നും മന്ത്രി ജി. സുധാകരൻ ആലപ്പുഴയിൽ പറഞ്ഞു.
