ന്യൂഡൽഹി: എഫ്എഎംഇ ഇന്ത്യ പദ്ധതി പ്രകാരം 24 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 62 നഗരങ്ങളിൽ 2,636 ഇലക്ട്രിക് വാഹന ചാർജിംഗ് സ്‌റ്റേഷനുകൾ സ്ഥാപിക്കാൻ സർക്കാർ അനുമതി നൽകി. ഇലക്ട്രിക് വാഹന മോഡലുകൾ പുറത്തിറക്കാൻ വാഹന നിർമ്മാതാക്കളെ ഇത് പ്രോത്സാഹിപ്പിക്കുമെന്ന് കേന്ദ്രമന്ത്രി പ്രകാശ് ജാവദേക്കർ പറഞ്ഞു.
നഗരങ്ങളിൽ ചാർജിംഗ് സ്‌റ്റേഷനുകൾ സ്ഥാപിക്കുന്നതിന് എഫ്എഎംഇ ഇന്ത്യ സ്‌കീമിന്‍റെ രണ്ടാം ഘട്ടത്തിന് കീഴിൽ ആനുകൂല്യങ്ങൾ ലഭിക്കുന്നതിനായി സ്ഥാപനങ്ങളിൽ നിന്ന് ഹെവി ഇൻഡസ്ട്രി വകുപ്പ് അപേക്ഷ ക്ഷണിച്ചിരുന്നു.
എഫ്എഎംഇ ഇന്ത്യ പദ്ധതിയുടെ രണ്ടാം ഘട്ടത്തിൽ, വിവിധ സംസ്ഥാനങ്ങൾക്ക് അനുവദിച്ച ഇവി ചാർജിംഗ് സ്‌റ്റേഷനുകളുടെ എണ്ണം ചുവടെ പട്ടികപ്പെടുത്തിയിരിക്കുന്നു:
| EV charging stations | State |
| 317 | മഹാരാഷ്‌ട്ര |
| 266 | ആന്ധ്രാപ്രദേശ് |
| 256 | തമിഴ്‌നാട് |
| 228 | ഗുജറാത്ത് |
| 205 | രാജസ്‌ഥാൻ |
| 207 | ഉത്തർപ്രദേശ് |
| 172 | കർണാടക |
| 159 | മധ്യപ്രദേശ് |
| 141 | പശ്ചിമ ബംഗാൾ |
| 138 | തെലങ്കാന |
| 131 | കേരള |
| 72 | ഡൽഹി |
| 70 | ചണ്ഡീഗഢ് |
| 50 | ഹരിയാന |
| 40 | മേഘാലയ |
| 37 | ബീഹാർ |
| 29 | സിക്കിം |
| 25 | ജമ്മു, ശ്രീനഗർ, ഛത്തീസ്‌ഘഡ് |
| 20 | ആസാം |
| 18 | ഒഡിഷ |
| 10 | ഉത്തരഖണ്ഡ്, പുതുച്ചേരി, ഹിമാചൽ പ്രദേശ് |
ചാർജ് ചെയ്യുന്ന സ്‌റ്റേഷനുകൾക്ക് സ്ഥലത്തിന്‍റെ ലഭ്യത ഉറപ്പുവരുത്തുക, ആവശ്യമായ കരാറുകളിൽ ഒപ്പുവക്കുക എന്നിവ ഉറപ്പുവരുത്തി ബന്ധപ്പെട്ട പങ്കാളി സംഘടനകളായ സിറ്റി മുനിസിപ്പൽ കോർപ്പറേഷൻ / ഡിസ്കോം / ഓയിൽ കമ്പനികൾ എന്നിവയുമായി ധാരണാപത്രങ്ങൾ ഒപ്പുവെച്ചതിന് ശേഷം തിരഞ്ഞെടുത്ത സ്ഥാപനങ്ങൾക്ക് അനുമതി കത്തുകൾ ഘട്ടംഘട്ടമായി നൽകും.
ഈ 2,636 ചാർജിംഗ് സ്‌റ്റേഷനുകളിൽ 1,633 ഫാസ്‌റ്റ് ചാർജിംഗ് സ്‌റ്റേഷനുകളും ബാക്കിയുള്ള 1,003 സ്ലോ ചാർജിംഗ് സ്‌റ്റേഷനുകളും ആയിരിക്കും. തിരഞ്ഞെടുത്ത നഗരങ്ങളിലുടനീളം 14,000 ചാർജറുകൾ സ്ഥാപിക്കും.
