തിരുവനന്തപുരം: കേന്ദ്ര സര്‍ക്കാര്‍ സംസ്ഥാനത്തിന്‍റെ വികസ്വന സ്വപ്നങ്ങളുടെ ചിറകരിയുന്നുവെന്ന് മുഖ്യമന്ത്രി പിണറായി വിജയന്‍. മന്ത്രിസഭാ യോഗത്തിന് ശേഷം നടത്തിയ വാർത്താ സമ്മേളനത്തിലാണ് മുഖ്യമന്ത്രി കേന്ദ്രസർക്കാരിനെതിരെ രൂക്ഷ വിമർശനം നടത്തിയത്. വികസനകാര്യങ്ങളില്‍ കേന്ദ്രം സംസ്ഥാനത്തെ തഴയുന്നു. ഏയിംസും റെയില്‍വേ സോണും അര്‍ഹതപ്പെട്ട വിഹിതവും കേരളത്തിന് അനുവദിച്ചില്ല. അതീവ പ്രാധാന്യമുള്ള ദേശീയ പാത വികസനത്തില്‍ പോലും കേന്ദ്രം ഏകപക്ഷീയമായ തീരുമാനങ്ങളെടുക്കുകയാണ്.
വികസനത്തില്‍ കേന്ദ്രം കേരളത്തെ തഴയുന്നു: രൂക്ഷ വിമർശനവുമായി പിണറായി ഉപേക്ഷിക്കപ്പെടുന്ന സാഹചര്യത്തില്‍ നിന്നും ദേശീയപാതാ വികസനം ഇടത് സര്ക്കാരാണ് മുന്നോട്ട് കൊണ്ട് പോയത്. സ്ഥലം ഏറ്റെടുക്കുന്നതിലുള്ള പ്രശ്നങ്ങള്‍ പരിഹരിച്ചു. പിന്നാലെ സ്ഥലമെറ്റെടുപ്പ് നിര്‍ത്താന്‍ സംസ്ഥാനത്തോട് ചര്‍ച്ച ചെയ്യാതെ കേന്ദ്രം തീരുമാനമെടുത്തു. ഇതോടെ രണ്ട് വർഷത്തെക്ക് കേരളത്തിലെ ദേശീയ പാത വികസനം സ്തംഭിച്ചവെന്നും മുഖ്യമന്ത്രി പറഞ്ഞു. സംസ്ഥാനത്തിന്‍റെ വികസനം തടസ്സപ്പെടുത്താൻ ബിജെപി സംസ്ഥാന അധ്യക്ഷൻ പിഎസ് ശ്രീധരൻ പിള്ള രഹസ്യമായി കേന്ദ്രത്തിന് കത്തയച്ചെന്നും മുഖ്യമന്ത്രി പറഞ്ഞു. ശ്രീധരൻ പിള്ളക്ക് സാഡിസ്റ്റ് മനോഭാവമാണ്. അവകാശങ്ങൾ തട്ടിത്തെറിപ്പിക്കുന്നവരെ ജനം തിരിച്ചറിയണം. സംഘപരിവാർ ശ്രമിക്കുന്നത് കേരളത്തിന്‍റെ വികസനം തടസപ്പെടുത്താനാണ്. ബിജെപി ഭരിക്കുന്ന സംസ്ഥാനങ്ങൾക്ക് മാത്രം കേന്ദ്രം പ്രാധാന്യം നല്‍കുന്നതായും മുഖ്യമന്ത്രി ആരോപിച്ചു.
