ചെന്നൈ : 500 റീട്ടെയില്‍ മദ്യ വില്‍പ്പനശാലകള്‍ അടച്ചുപൂട്ടാനൊരുങ്ങി തമിഴ്‌നാട് സ്‌റ്റേറ്റ് മാർക്കറ്റിങ് കോർപറേഷൻ (TASMAC). മുമ്പ് പുറത്തിറങ്ങിയ സര്‍ക്കാര്‍ ഉത്തരവ് നടപ്പാക്കുന്നതിന്‍റെ ഭാഗമായി 500 ചില്ലറ മദ്യവില്‍പ്പനശാലകള്‍ അടച്ചുപൂട്ടാനാണ് തമിഴ്‌നാട് സര്‍ക്കാരിന്‍റെ ഉടമസ്ഥതയിലുള്ള മദ്യത്തിന്‍റെ ചില്ലറ വിൽപ്പനക്കാരായ ടാസ്‌മാക്കിന്‍റെ തീരുമാനം. ഈ മദ്യവില്‍പ്പനശാലകള്‍ ജൂണ്‍ 22 മുതല്‍ തുറന്നുപ്രവര്‍ത്തിക്കില്ലെന്ന് ടാസ്‌മാക് വ്യക്തമാക്കി.
അടച്ചുപൂട്ടലിലേക്ക് വന്നത് ഇങ്ങനെ : മുന്‍ എക്സൈസ് ആൻഡ് പ്രൊഹിബിഷൻ മന്ത്രിയും അടുത്തിടെ എന്‍ഫോഴ്‌സ്‌മെന്‍റ് ഡയറക്‌ടറേറ്റ് ചോദ്യം ചെയ്യലിനിടെ നെഞ്ചുവേദനയെ തുടര്‍ന്ന് ആശുപത്രിയില്‍ പ്രവേശിപ്പിക്കപ്പെടുകയും ചെയ്‌ത വി.സെന്തില്‍ ബാലാജി, 2023 ഏപ്രില്‍ 12 നാണ് ചില്ലറ മദ്യവില്‍പ്പനശാലകള്‍ അടച്ചുപൂട്ടുന്നത് സംബന്ധിച്ച് നിയമസഭയില്‍ പ്രഖ്യാപനം നടത്തുന്നത്. തുടര്‍ന്ന് 2023 ഏപ്രില്‍ 20 ന് 500 ചില്ലറ മദ്യവില്‍പ്പനശാലകള്‍ അടച്ചുപൂട്ടുന്നത് സംബന്ധിച്ച് സര്‍ക്കാര്‍ ഉത്തരവിറക്കി. ഇതിന്‍റെ അടിസ്ഥാനത്തില്‍ ജൂണ്‍ 22 മുതല്‍ പ്രസ്‌തുത മദ്യവില്‍പ്പനശാലകള്‍ തുറന്നുപ്രവര്‍ത്തിക്കില്ലെന്ന് ടാസ്‌മാക് പ്രസ്‌താവനയിലൂടെ അറിയിക്കുകയായിരുന്നു.
മന്ത്രി മാറി, നിലപാട് മാറിയില്ല : ഇഡി ചോദ്യം ചെയ്‌ത് അറസ്‌റ്റ് ചെയ്‌തതിന് പിന്നാലെ ആരോഗ്യസ്ഥിതി മോശമായി ആശുപത്രിയില്‍ തുടരുന്ന സെന്തില്‍ ബാലാജിയില്‍ നിന്നും അദ്ദേഹം വഹിച്ചിരുന്ന വകുപ്പുകള്‍ എസ്‌.മുത്തുസാമിക്ക് സര്‍ക്കാര്‍ കൈമാറിയിരുന്നു. സര്‍ക്കാര്‍ ഉത്തരവ് പ്രകാരം 500 ചില്ലറ മദ്യവില്‍പ്പനശാലകള്‍ അടച്ചുപൂട്ടുമെന്ന് മുത്തുസാമിയും വ്യക്തമാക്കി. സർക്കാര്‍ ടാസ്‌മാക് മുന്നോട്ടുകൊണ്ടുപോവുന്നത് പണമിടപാട് നടത്തുന്നതിനോ സർക്കാരിന്‍റെ ഖജനാവിൽ പണം കണ്ടെത്തുന്നതിനോ അല്ല. പകരം മദ്യത്തിന് അടിമകളാകുന്നവരുടെ എണ്ണം കുറയ്ക്കുക എന്ന ഉദ്ദേശത്തോടെയാണ്. മദ്യവിൽപ്പനയിൽ 50,000 കോടി രൂപ സമാഹരിക്കുകയെന്ന ലക്ഷ്യം മുന്നോട്ടുവച്ചത്, അനധികൃത ചാരായം, വാറ്റ് എന്നിവ തടയാൻ കൂടിയാണെന്നും മന്ത്രി വ്യക്തമാക്കി.
മുമ്പും അടച്ചുപൂട്ടലുകള്‍ : 2004 മാര്‍ച്ചില്‍ തമിഴ്‌നാട്ടില്‍ 7,896 ചില്ലറ മദ്യവില്‍പ്പനന ശാലകളാണ് ഉണ്ടായിരുന്നത്. 2023 മാര്‍ച്ച് 31 ആയപ്പോള്‍ മദ്യവില്‍പ്പനശാലകളുടെ എണ്ണം 5,329 ആയി കുറഞ്ഞു. ഇവയില്‍ 1,379 എണ്ണം ബാറുകളോ ബാറുമായി ബന്ധപ്പെട്ടുള്ളതോ ആണ്. ബാക്കിയുള്ളവയാണ് ഒറ്റപ്പെട്ടവയായി പ്രവര്‍ത്തിച്ചുവരുന്നത്. അതേസമയം 2015 ലും രണ്ടുവര്‍ഷങ്ങള്‍ക്കിപ്പുറം 2017 ലും 500 വീതം ചില്ലറ മദ്യവില്‍പ്പനശാലകള്‍ അടച്ചുപൂട്ടിയിരുന്നു. അതിന് പിന്നാലെയാണ് നിലവിലെ ഉത്തരവും.
സെന്തില്‍ ബാലാജിയുടെ അറസ്‌റ്റ് : ഇക്കഴിഞ്ഞ ജൂണ്‍ 14 ന് പുലര്‍ച്ചെ 3.30 ഓടെയാണ് മന്ത്രി സെന്തില്‍ ബാലാജി എന്‍ഫോഴ്‌സ്‌മെന്‍റ് ഡയറക്‌ടറേറ്റ് ഉദ്യോഗസ്ഥരുടെ ചോദ്യം ചെയ്യലിനിടെ കുഴഞ്ഞുവീഴുന്നത്. അദ്ദേഹം നെഞ്ചുവേദനയെ തുടർന്ന് തളർന്നുവീണ് പൊട്ടിക്കരയുന്നതിന്‍റെയും എൻഫോഴ്‌മെന്‍റ് ഉദ്യോഗസ്ഥർ മന്ത്രിയെ ചെന്നൈ ഒമൻഡുരാർ സർക്കാർ ആശുപത്രിയിലെത്തിക്കുന്നതിന്‍റെയും ദൃശ്യങ്ങൾ പിന്നാലെ പുറത്തുവന്നിരുന്നു. പിന്നീട് മന്ത്രിയുടെ വീടിന് മുന്നില്‍ മണിക്കൂറുകളോളം കാത്തുനിന്ന ചാനല്‍ ക്യാമറകള്‍ക്ക് മുന്നിലൂടെയാണ് ഇഡി ഉദ്യോഗസ്ഥരുടെ വാഹനങ്ങൾ മന്ത്രിയുമായി ആശുപത്രിയിലേക്ക് തിരിച്ചത്.
സെന്തില്‍ ബാലാജിയെ പ്രവേശിപ്പിച്ച വിവരമറിഞ്ഞ് ഡിഎംകെ മന്ത്രിസഭയിലെ പ്രമുഖർ പുലർച്ചെ തന്നെ ആശുപത്രിയിലെത്തി അദ്ദേഹത്തെ കണ്ടിരുന്നു. മുഖ്യമന്ത്രി എം.കെ സ്‌റ്റാലിന്‍റെ മകനും മന്ത്രിയുമായ ഉദയനിധി സ്റ്റാലിൻ, എം.സുബ്രഹ്മണ്യൻ, ഇവി വേലു, ശേഖർ ബാബു എന്നിവരാണ് ആശുപത്രിയിലെത്തിയത്. ഇഡി ഉദ്യോഗസ്ഥര്‍ അദ്ദേഹത്തിന്‍റെ അറസ്‌റ്റ് രേഖപ്പെടുത്തിയെങ്കിലും ആശുപത്രിയില്‍ തുടരാന്‍ കോടതി അനുവദിക്കുകയായിരുന്നു.
